Astanada ІІ toqsanda zańdy tulǵalar 3,5 paıyzǵa artyq tirkeldi
ASTANA. 11 shilde. QazAqparat - 2013 jyldyń ІІ toqsanynda alǵashqy tirkeýden ótken zańdy tulǵalar sany - 1304 boldy. Olardyń negizi Almaty (49,2%) jáne Saryarqa aýdandarynda (32,2%) shoǵyrlanǵan. Esil aýdanynyń úles salmaǵy 18,6 paıyz bolyp otyr. Bul týraly astana.kz saıtyna qalalyq statıstıka departamentinen málim etti.
Jańadan qurylǵan zańdy tulǵalar tirkeý kezindegi josparlanǵan kásiporyndar sanyna sáıkes 1282 bolsa, olardyń 21 - orta, 1 iri kásiporyn.
«Bıylǵy jyldyń ІІ toqsanynda ótken jyldyń osy kezeńimen salysyrǵanda shaǵyn kásiporyn sany 43,5%-ǵa óskendigi baıqalady. Sondaı-aq, bir ýaqytta 10 orta kásiporyn men ótken jylǵydaı 1 iri kásiporyn tirkeldi.
Jańa kásiporyndardyń kópshiligi saýda salasyna (26%) jáne qurylysqa (24%) baǵyttalǵan. Basqa da qyzmetter úshin 13%; ǵylym men tehnıka qyzmetine - 6%-dan keledi. Kólik pen qoıma sharýashylyǵyna, ónerkásip pen bilim jáne densaýlyq saqtaýǵa orta eseppen 4%-dan keledi. Al, qoǵamdyq uıymdar men qorlardyń, ákimshilik jáne kómekshi qyzmetter salasy, jyljymaıtyn múlik men aqparat pen baılanys 3%-dan aınalyp tur.
Jańa zańdy tulǵalardyń 94,7%-y jaýapkershiligi shekteýli seriktestik retinde tirkelgen. Jyl basynan beri JShS sanyn salystyrǵanda olardyń úlesi 7,4 paıyzǵa óskendigi kórinedi. Sonymen qatar, atalǵan kezeńde tirkelgen kásiporyndar men mekemeler qatarynda 3,2%-yn qoǵamdyq birlestikter men qorlar; 1%-yn - mekemeler men memlekettik kásiporyndar; 0,7%-yn - zańdy tulǵalar birlestigi; 0,2%-yn - tutyný kooperatıvteri men aktsıonerlik qoǵamdar quraıdy.
2013 jyldyń ІІ toqsanynda tirkelgen zańdy tulǵalar arasynda er basshylar úlesi - 73,8%, áıel basshylar - 26,2% boldy. Osy jyldyń basynda zańdy tulǵalar arasynda er basshylar sany - 73,9%, áıel basshylar - 26,1% edi.
