Astanada ІІ halyqaralyq «KazMeat&Milk-2011» mal sharýashylyǵy forýmy ótedi
ASTANA. 20 shilde. QazAqparat - 2011 jyldyń 29 shildesinde Astanada V Qazaqstannyń agroónerkásiptik kesheni jetistikteriniń «Qaraótkel-2011» jármeńkesi aıasynda, Qazaqstan Respýblıkasy Aýyl sharýashylyǵy mınıstrligi
men «QazAgro» ulttyq basqarýshy holdıngi» AQ resmı qoldaýymen, II Halyqaralyq «KazMeat&Milk-2011» mal sharýashylyǵy forýmy ótedi, dep habarlady «QazAghomarketıng» AQ baspasóz qyzmeti.
Forým qonaqtaryn «Radisson SAS Hotel» qonaqúıi qarsy alady. Forýmǵa qatysýshylar arasynda AQSh, Kanada, Eýropa, Avstralııa men Okeanııanyń iskerlik sala ókilderi, sonymen qatar otandyq jetekshi mal sharýashylyǵy ónimderin óndirýshiler bolady.
Forýmnyń ýaqyt talabyna saı ótkizilýi men ózektiligi sózsiz. Qazaqstannyń aýyl sharýashylyǵy salasynyń aldynda iri qara mal etiniń eksporttyq áleýetin aıtarlyqtaı kóbeıtip, álemniń jetekshi et eksporttaýshy elderiniń qatarynan oryn alý eleýli mindeti tur. Bul maqsattarǵa jetý úshin búginniń ózinde respýblıkada asyl tuqymdy ortalyq-reprodýktorlar qurylyp, asyl tuqymdy mal ákelinýde, zamanaýı mal bordaqylaý alańdary salynýda. Sharýa qojalyqtarynyń damýyna da mán berilýde. Sonymen qatar aımaqtarda iri qara maldy qoldan uryqtandyrý, maldy birdeılendirý, aýylǵa veterınar mamandardy tartý jumystary jalǵasýda.
Forým aıasynda mal sharýashylyǵy salasynyń damý múmkindikteri, mal sharýashylyǵy ónimi naryǵynyń ınfraqurylymy, mal sharýashylyǵy salasynyń tıimdiligin arttyrýdyń negizgi faktorlary talqylanady. Mal sharýashylyǵy keshenderin, qural-jabdyqtaryn, veterınarlyq preparattardy óndirýshiler otandyq mal sharýashylyǵy qojalyqtarynyń damýy men qaıta jasaqtalýyna septigin tıgizetin óz ónimderin aýyl sharýashylyǵy taýar óndirýshileriniń nazaryna usynady.
Mal sharýashylyǵynyń damýynda etti taza tuqymdy iri qara mal qaýymdastyqtaryn qurýǵa aıtarlyqtaı mán beriledi. Mundaı uıymdardyń qyzmet tájirıbesimen forýmǵa qatysýshylardy Germanııa, Kanada, Avstralııa jáne Jańa Zelandııadan kelgen sarapshylar tanystyrady. Taza tuqymdy etti iri qara mal boıynsha otandyq qaýymdastyqtardyń qyzmeti algorıtmi «Qazagromarketıng» AQ jetekshiligimen qazaqstandyq qaýymdastyqtar ókilderiniń, asyl tuqymdy mal sharýashylyqtary basshylarynyń, halyqaralyq sarapshylardyń qatysýymen «dóńgelek ústel» barysynda talqylanady.
