Astanada ІІ halyqaralyq «Dala daýysy» radıofestıvali jeńimpazdaryn saltanatty marapattaý keshi ótedi

Festıval «Qazaqstan» ortalyq kontsert zalynda caǵat 19 00 de bastalady. Bul iri jobada radıotyńdaýshy jáne kásibı mamandar anyqtaǵan úzdik ánderdiń oryndaýshylary óner kórsetedi. Atap aıtqanda, Festıvalǵa Qazaqstan, Túrkııa, Reseı, Qytaı, Qyrǵyzstan memleketterinen óner juldyzdary qatysady.

Bul týraly festıvaldi uıymdastyrý komıtetinen habarlady.

Qazaq mýzyka mádenıetindegi barlyq oryndaýshylyq mánerlerdi qamtıtyn «Dala daýysy» jobasynda jeńimpazdar «Dástúrli oryndaýshy», «Akademııalyq oryndaýshy», «Estradalyq oryndaýshy» atalymdary boıynsha marapattalyp, festıvaldiń «Jańa esimderi» belgili bolady.

Elimizdegi óner jáne mádenıet, qoǵam qaıratkerleri jeńimpazdardy marapattaıdy. Olar «Dala daýysynyń» arnaıy statýetkasyn jáne arnaıy dıplomdardy tapsyrady.

«Dala daýysy» - radıofestıval retinde Qazaq radıosynyń efırinde 2012 jyldan bastaý alǵan bolatyn. Onyń maqsaty - qazaq ániniń Halyqaralyq deńgeıdegi zamanaýı, básekege qabiletti tóltýmalyq dybysyn nasıhattaý, tyńdaýshynyń talǵamynan shyqqan shyǵarmalar arqyly oryndaýshylardy marapattaý, án dástúrimizdiń jalǵasýyna radıoefır arqyly yqpal etý bolyp tabylady.

«Dala daýysy» - mýzyka arqyly qazaq tilin dúnıejúzi elderi arasynda nasıhattaıtyn Qazaqstandaǵy birinshi radıofestıval. Festıvalǵa qatysýshy shet eldik úmitkerge qazaq ánin oryndaý, nemese óz halqynyń ánin qazaq tilinde oryndaý talaby qoıylǵan. Ondaǵy maqsat - qazaq ánin shet eldikterge oryndatý arqyly ulttyq mýzykalyq jáne poetıkalyq tildi nasıhattaý, sińirý.

«Dala daýysy» - tek qana radıofestıval emes, bedeldi mýzykalyq sherý. Qazaq radıosynyń mıllıondaǵan tyńdarmandary ınternet arqyly súıikti ánderine daýys berip, jeńimpazdardy anyqtaıdy. 3-4 apta boıyna alǵashqy bestikten kóringen oryndaýshylar ǵana fınalǵa joldama almaq. Fınalda 40% tyńdarman daýysy negizinde, 40% mamandar saraptaýy arqyly, 20 % joba uıymdastyrýshylarynyń usynysy arqyly «Dala daýysy» syılyǵynyń ıegeri anyqtalady.

«Dala daýysy» ІІ Halyqaralyq radıofestıvaline 100 oryndaýshy qatysyp, 20 oryndaýshy jeńimpaz atanbaq.