Astanada JI-fılmder festıvali ótedi: Qazylar alqasynda jasandy ıntellekt bolýy múmkin
ASTANA. KAZINFORM – Bıyl kúzde Astanada alǵash ret jasandy ıntellekt kómegimen túsirilgen fılmderge arnalǵan «Astana AI Film Festival» (AAIFF 2026) halyqaralyq kınofestıvali ótedi. Kreatıvti ındýstrııany damytýǵa baǵyttalǵan jobanyń jalpy júlde qory 1 mıllıon AQSh dollary. Bul týraly elordada ótken baspasóz konferentsııasynda uıymdastyrýshylar málimdedi.
Baıqaýǵa qatysýǵa nıet bildirýshilerden ótinimder 2026 jyldyń mamyr aıynda bastalyp, tamyz aıynyń sońyna deıin qabyldanady. Festıvalge álemniń kez kelgen elinen kásibı stýdııalar da, jeke kreatorlar da qatysa alady.
Basty shart – týyndynyń uzaqtyǵy 10 mınýtqa deıingi qysqametrajdy AI-fılm bolýy jáne ol 100% jasandy ıntellekt tehnologııalarynyń kómegimen ázirlenýi tıis.
– JI-fılm – eksperımenttik format. Bizdiń maqsatymyz – kásibı mamandar men qatardaǵy kórermendi biriktiretin jańa platforma qalyptastyrý. Festıval AI Week jáne Digital Bridge halyqaralyq tehnologııalyq aptalyǵy aıasynda ótedi. Biz álemdik deńgeıdegi prodıýserler men rejısserlerden turatyn qazylar alqasyn jasaqtaýdamyz, – dedi Ozen kompanııasynyń negizin qalaýshysy, uıymdastyrýshylardyń biri Aızatýlla Hýsseın.
Festıvaldiń eń basty jańalyǵy – qazylar alqasynyń quramyna jasandy ıntellektiniń ózin qosýy múmkin. Tehnıkalyq mamandar JI-diń stsenarıı men vızýaldy estetıkany nysandy túrde baǵalaý qabiletin zerttep jatyr.
– Biz qazylar alqasynyń bir múshesin jasandy ıntellekt qylýdy josparlap otyrmyz. Ol stsenarııdi túsinip, óz taldaýyn bere alady. Bul baǵalaýdyń obektıvtiligin arttyrady dep senemiz. Sondaı-aq JI kómegimen avtorlyq quqyqtyń buzylmaýyn, plagıattyń bolmaýyn qatań qadaǵalaımyz, – dep atap ótti festıval uıymdastyrýshysy, Brave Talents kompanııasynyń jetekshisi Almas Jalı.
Baıqaý aıasynda «Úzdik fılm», «Úzdik kınematografııa» jáne «Úzdik storıtellıng» sııaqty nomınatsııalar boıynsha jeńimpazdar anyqtalady. Sondaı-aq uıymdastyrýshylar tarapynan berilgen arnaıy taqyrypty eń úzdik ashqan týyndyǵa bólek marapat qarastyrylǵan.
Uıymdastyrýshylar bul is-sharany jyl saıyn ótkizip, Qazaqstandy Eýrazııadaǵy JI-tehnologııalar men kreatıvti ındýstrııanyń basty kópirine aınaldyrýdy kózdep otyr. Eń úzdik jumystar festıvaldiń resmı saıtynda jarııalanady.
Aıta keteıik, elimizde 2030 jylǵa qaraı JI salasynda 10 000 maman daıyndaý kózdelip otyr.
