Astanada ıgerilmegen jer ýchaskesi memleket menshigine qaıtaryldy

ASTANA. KAZINFORM — Elordada aýdany 8,9377 gektar bolatyn, buryn saýda ortalyǵyn salýǵa berilgen, biraq ıgerilmeı qalǵan jer ýchaskesi memleket menshigine qaıtaryldy, dep habarlaıdy Aýyl sharýashylyǵy mınıstrliginiń baspasóz qyzmeti. 

Astana qalasynyń jer resýrstaryn basqarý departamenti (QR AShM Jer resýrstaryn basqarý komıtetiniń aýmaqtyq bólimshesi) jospardan tys tekserý júrgizdi. Nátıjesinde, jer telimi uzaq ýaqyt boıy nysanaly maqsatta paıdalanylmaǵany anyqtaldy.

Tekserý qorytyndysy boıynsha jer paıdalanýshyǵa jer zańnamasyn buzýshylyqtardy bir jyl ishinde joıý týraly nusqama berildi. Alaıda, belgilengen merzimde nusqama talaptary oryndalmaǵan. Osyǵan baılanysty departament Astana qalasynyń mamandandyrylǵan aýdanaralyq ekonomıkalyq sotyna jer ýchaskesin májbúrlep alý týraly talap aryzben júgindi.

Sot sheshimimen talap qanaǵattandyrylyp, ýchaskeni memleket menshigine qaıtarý týraly sheshim zańdy kúshine endi.

Astana qalalyq sotynyń azamattyq ister jónindegi sot alqasy alǵashqy sot sheshimin ózgerissiz qaldyrdy.

Qazirgi ýaqytta jer ýchaskesi tolyqtaı memlekettik menshikke qaıtaryldy.

Budan buryn Almaty oblysynda 10 jer ýchaskesi aýktsıonǵa qoıylǵanyn jazǵanbyz.