Astanada ıesiz janýarlar panalaıtyn 700 oryndyq ortalyq salynyp jatyr
ASTANA. QazAqparat - Astanada qańǵybas janýarlarǵa arnalǵan memlekettik mekemeniń qurylysy júrgizilip jatyr. Josparǵa sáıkes nysan kelesi jyldyń kókteminde paıdalanýǵa beriledi, dep habarlaıdy elorda ákimdiginiń resmı saıty.
Qalanyń veterınarlyq qyzmeti bergen málimetterge súıensek, qazirgi tańda Astanada panasyz janýarlarǵa arnalǵan «Asenka» jáne «Kovcheg» atty 2 jeke mekeme bar.
«Sonymen qatar, elordada ıesi joq janýarlarǵa arnalǵan memlekettik mekemeniń qurylysy júrgizilip jatyr. Nysan kelesi jyldyń 30 sáýirinde paıdalanýǵa beriledi dep josparlanýda», - dedi «Astana vetqyzmet» kásiporny dırektorynyń orynbasary Medet Qylyshbaev.
Janýarlar úıi 700 orynǵa laıyqtalǵan. 500 oryn qaýmal tıpti bolsa, 200 oryn karantındi aımaqta ornalaspaq.
Janýarlardy munda ustaý merzimi ázirge belgilengen joq. Al «Astana vetqyzmet» qazirgi tańda janýarlarǵa chıpti tegin taǵý, olardy zararsyzdandyrý aktsııasyn, qutyrýǵa qarsy ekpeni tegin egý sharalaryn júrgizip jatyr.
2019 jylǵa kásiporyn ıtterge arnalǵan chıpterdiń 8 myń danasyna, 5 myń ıt pen mysyqty tegin zararsyzdandyrý men pishtirý jumysyna tapsyrys berdi.
Qutyrýǵa qarsy ekpe aqpannan bastap egiledi.
Memlekettik tapsyrys boıynsha 11 myń janýar egilmek. Olardyń 3 myńy - mysyqtar, 8 myńy - ıtter.
«Biz máslıhatqa janýarlardy ustaý erejelerine ózgerister engizý týraly usynysymyzdy aıttyq. Bizdiń oıymyzsha, azamattardy óz janýarlaryn zararsyzdandyrýǵa mindetteý kerek. Ieleri olardy ósirýmen aınalyspasa, árıne. Sondaı-aq, janýarlarǵa chıp taǵýdy mindetter qataryna engizýdi usynamyz. Bul azamattardyń óz janýary úshin jaýapkershiligin arttyrýǵa septigin tıgizedi», - dedi Medet Qylyshbaev.
