Astanada «Iegova kýágerleri» ýaǵyzshysyna úkim shyqty

ASTANA. QazAqparat -  Saryarqa aýdandyq soty «Iegova kýágerleri» hrıstıan qaýymdastyǵy» dinı birlestiginiń ókili Teımýr Ahmedovke úkim shyǵardy, dep habarlady «QazAqparat» HAA tilshisi.

Oǵan dinaralyq alaýyzdyq týdyrǵany úshin 5 jyl merzimge bas bostandyǵynan aıyrý úkimi shyqty. «Buryn sottalmaǵan Teımýr Ahmedov Sultanoglyǵa qatysty qamaýǵa alý túrinde bultartpaý sharasy qabyldandy. Kýágerlerden jaýap alyp, sotqa deıingi óndiris, sot tergeýi materıaldaryn zerdelep, sot pikirsaıysyn jáne sottalýshynyń sońǵy sózin tyńdap, QR QPK 387, 390, 393, 395, 398, 401, 402-baptaryn basshylyqqa alyp, sot Teımýr Ahmedov Sultanoglyny QR QK 174-baby 2-bóliginde kózdelgen qylmysty jasaǵany úshin aıypty dep tanydy jáne oǵan atalǵan bapta kózdelgen 5 jyl bas bostandyǵynan aıyrý túrindegi jazany taǵaıyndaý úkimin shyǵardy», - degen úkimdi oqydy sýdıa Talǵat Syrlybaev.

Eske salsaq, QR UQK qyzmetkerleri 2017 jylǵy 18 qańtarda qoǵamdastyq músheleri Teımýr Ahmetov pen Asafa Gýlıevti ustady. UQK aqparatyna sáıkes olar Astanada ártúrli páterlerde túrli konfessııa men etnostar ókilderiniń dinı jáne ulttyq sezimderin kemsitý belgileri oryn alǵan birqatar dinı jınalystar ótkizgen.