Astanada IBM kompanııasynyń ınnovatsııalar ortalyǵy ashyldy

Bul júıe baǵdarlamalyq qamsyzdandyrý jáne standarttar bazasyna keń aýqymda qol jetkizýge múmkindik beredi. Bul otandyq aqparattyq tehnologııalar naryǵy úshin óte mańyzdy, dep habarlaıdy QazAqparat.

IBM kompanııasy Power systems bólimshesiniń bas menedjeri Ross Maýrıdyń sózine qaraǵanda, Linux-tiń operatsııalyq júıesin álemdegi qýatty sýper kompıýterlerdiń 94 paıyzy paıdalanady. Bul júıe 1990 jyldan bastap qoldanylyp keledi jáne túrli salalarda, atap aıtqanda ekonomıka, basqarýshylyq apparatty tehnıkalyq jaǵynan qamsyzdandyrý salalarynda ózin tabysty kórsete bildi. Álemdegi kóptegen baǵdarlamalyq qujattar atalmysh júıeni qoldana otyryp jumys isteýde.

Astanada ashylǵan IBM kompanııasynyń ınnovatsııalar ortalyǵynyń jumysy baǵdarlamalyq qamsyzdandyrýdyń óńirlik táýelsiz jetkizýshilerin jáne IBM kompanııasynyń bıznes áriptesterin qoldaýǵa; elektrondy úkimet servısteriniń prototıpterin jáne Linux bazasynda basqa da sheshimderdi ázirleýge, sondaı-aq memlekettik vedomstvolar men uıymdarǵa arnalǵan baǵdarlamalyq qamsyzdandyrýdy ashýǵa; Qazaqstannyń bilim berý júıesine arnalǵan «elektrondy oqytý» zamanaýı baǵdarlamasyn ázirleýge; qazaqstandyq tutynýshylardy Linux-tiń múmkindikterimen tanystyrýǵa baǵyttalatyn bolady.

Mamandar atalmysh ortalyqtyń qurylýyn Qazaqstannyń IT-tehnologııalar salasyndaǵy tarıhı oqıǵa retinde baǵalaýda. «Zerde» aqparattyq-kommýnıkatsııalyq holdınginiń basqarma tóraǵasy Ádilbek Sársenovtyń pikirinshe, Qazaqstannyń ozyq elderdiń qataryna qosylýdy maqsat etip otryǵanyn eskeretin bolsaq, memlekettik sektorda jáne basqa da salalarda ashyq kodty baǵdarlamalyq qamtamasyzdandyrýdy paıdalanýdyń áleýeti zor. «Qazaqstannyń memlekettik organdary otandyq IT kompanııalarǵa baǵdarlamalyq qamsyzdandyrýda jáne IT qyzmetterde kóptegen tapsyrystar beredi. Ashyq kodty baǵdarlamalyq qamsyzdandyrý kóptegen aqparattyq júıeler úshin tıptik baǵdarlamalyq ázirlenimderdi ázirleýge ketetin shyǵyndardy aıtarlyqtaı qysqartýǵa múmkindik beredi», deıdi ol.