Astanada HOWO kóligi qaǵyp ketken júrginshi qaza tapty
ASTANA. QazAqparat - Astanada HOWO júrgizýshisi jaıaý júrginshini qaǵyp óltirdi, dep habarlady elordalyq ІІD baspasóz qyzmetinen.
Jol-kólik apaty 20 sáýirde saǵat 15.00-de oryn aldy.
«50 jastaǵy HOWO markaly kólikti basqaryp kele jatqan «K» esimdi júrgizýshi Turan dańǵyly men Kereı-Jánibek handar kósheleriniń qıylysynda 1962 jyly týǵan jaıaý júrginshini qaǵyp ketti. Áıel retteletin jaıaý júrginshiler jolymen baǵdarshamnyń qyzyl túsine qaramastan joldy kesip ótken»,- delingen habarlamada.
Jol-kólik oqıǵasy saldarynan jaıaý júrginshi alynǵan jaraqattar saldarynan oqıǵa ornynda qaza tapty.
Atalǵan fakt QR QK 345-baby 3-bólimi boıynsha sotqa deıingi tergeýdiń biryńǵaı reestrine tirkeldi.
Polıtsııa qyzmetkerleri jol-kólik oqıǵasyna baılanysty sotqa deıingi tergeý amaldaryn júrgizip jatyr.
