Elorda hostelderinde órt qaýipsizdigine qatysty reıd júrgizildi
ASTANA. KAZINFORM — Elordadaǵy hostelderde órt qaýipsizdigi talaptarynyń saqtalýyn kúsheıtý maqsatynda Astananyń Tótenshe jaǵdaılar departamentiniń qyzmetkerleri hostel ıeleri jáne turǵyndarymen profılaktıkalyq túsindirý jumysyn júrgizdi, dep habarlaıdy qala ákimdiginiń resmı saıty.
Tekserý barysynda mamandar órttiń aldyn alý sharalaryn túsindirip, tótenshe jaǵdaı týyndaǵan jaǵdaıda áreket etý tártibi men evakýatsııalaý erejelerine toqtaldy. Sonymen qatar hostelderde jıi kezdesetin qaýipsizdik talaptarynyń buzylýyna nazar aýdardy.
— Órttiń tutanýy men órt oqıǵalarynyń aldyn alý maqsatynda profılaktıkalyq jumys júrgizemiz. Polıtsııa basqarmasymen birlesip, túsindirý jumysyn ótkizip, reıd uıymdastyramyz. Sondaı-aq hostelder men ýaqytsha turý oryndarynda profılaktıkalyq jumys júrgizemiz. Eń jıi kezdesetin zańbuzýshylyqtyń biri — evakýatsııa joldarynyń janǵysh materıaldarmen taryltylýy. Atap aıtqanda, lınoleým, túrli tósenishter jáne basqa da janǵysh materıaldar evakýatsııa joldaryna tóseledi. Sonymen qatar, qysqa tuıyqtalýǵa sebep bolatyn aqaýly elektr quralyn paıdalaný da jıi kezdesedi. Sondaı-aq alkogoldik ishimdik ishý, belgilenbegen oryndarda temeki shegý sııaqty órt qaýipsizdigi talaptaryn buzý faktileri anyqtalady. Adamdardyń qaza bolýy, órttiń tutanýy jáne órt oqıǵalarynyń aldyn alý maqsatynda biz hostel ıelerimen, kásipkerlik sýbektilerimen jáne onda turatyn turǵyndarmen turaqty túrde profılaktıkalyq-túsindirý jumysyn júrgizemiz, — dedi TJD Memlekettik órt baqylaýy basqarmasynyń ınjeneri, aǵa leıtenant Ernazar Qarshyǵa.
Mamandardyń aıtýynsha, mundaı profılaktıkalyq kezdesý aldaǵy ýaqytta da jalǵasady. Negizgi maqsat — órt qaýipsizdigi talaptarynyń saqtalýyn kúsheıtip, tótenshe jaǵdaılardyń aldyn alý.
Buǵan deıin Almatyda hostelderdi jappaı tekseristen soń myńnan astam zań buzý deregi anyqtalǵan edi.
