Astanada Holokost qurbandaryn eske alý sharasy ótti (FOTO)
Ekinshi dúnıejúzilik soǵys jyldary evreılerdi jappaı joımaq bolǵan natsısterdiń qylmystaryn áshkereleý kúnine oraı jıyn barysynda azaly mıtıng ótti. Aıta keteıik, 2005 jyly 1 qarashada BUU Bas Assambleıasy 60/7 qararyn qabyldap, jyl saıyn 27 qańtardy Holokost qurbandaryn eske alýdyń halyqaralyq kúni retinde bekitti. Osyǵan baılanysty Ulttyq mýzeıde jınalǵan jurtshylyqqa arnaıy fılm kórsetildi.
«1945 jyldyń 27 qańtarynda Osventsım lagerinde (Polsha) qamaýda bolǵandar bosatyldy. Osy jerde kóp adam qyryldy, olardyń bir bóligi bosatyldy. Sondyqtan, bul kúndi sol náýbet jyldarynda ómiri qıylǵandardy eske alý kúni retinde atap ótemiz»,-dedi Qazaqstandaǵy Izraıl Elshisi Mıhaıl Brodskıı.
Bul kontslager jumys istep turǵan ýaqytta munda 1,5 mıllıonnan 2,2 mıllıon adamǵa deıin qaza tapqan, deıdi ártúrli derek kózderi. 1945 jyly dál osy kúni Keńes Armııasy natsıstik Osventsım-Bırkenaý ajal lagerin azat etken bolatyn.
«Búgin biz eske alý kúnin uıymdastyrdyq jáne oǵan QR Úkimetiniń ókilderi, qala turǵyndary, stýdentter men mektep oqýshylary keldi. Búgin jınalǵan jurtshylyqqa alǵysymyzdy bildiremiz»,-deıdi Elshi.
Sharany Qazaqstandaǵy Izraıl Elshiligi men QR-daǵy BUU ókildigi uıymdastyrdy.
