Astanada hokkeıden Asqar Zabıkýlındi eske alýǵa arnalǵan týrnır ótip jatyr
ASTANA. KAZINFORM – Astanadaǵy «Tarlan» sport kesheninde órt sóndirýshi, marqum Asqar Zabıkýlındi eske alýǵa arnalǵan týrnır ótip jatyr, dep habarlady elorda ákimdiginiń resmı saıty.
Alǵash ret hokkeıden uıymdastyrylyp jatqan básekede Astana qalasynyń 4 áýesqoı klýby jınaldy.
Týrnırdiń ashylý saltanatyna Astana qalalyq máslıhatynyń tóraǵasy Erlan Kanalımov qatysyp, marqum Asqar Zabıkýlınniń qurmetine baılanysty atqarylǵan sharalardy aıtyp ótti.
«Búgin shaıbaly hokkeıden Asqar Zabıkýlındi eske alýǵa arnalǵan týrnır ótip jatyr. Qyzmet barysynda qaza tapqan baýyrymyzdyń is-áreketi barshamyzǵa ónege. Ony eshkim umytpaı, árdaıym úlgi tutýymyz qajet. Byltyr Asqar Zabıkýlınniń qurmetine Úrker shaǵyn aýdanynda kósheniń aty berildi. Batyrymyzǵa arnaıy eskertkish ornatyldy. №6 mamandandyrylǵan órt sóndirý bólimi Asqar Zabıkýlınniń atymen atalady. Aspanymyz ashyq bolsyn! Beıbitshilik bolsyn! Búgingi týrnırge qatysyp jatqan komandalarǵa jeńis tileımin. Bir-birimizdi baǵalap, syılastyqta júre bereıik», - dedi Erlan Kanalımov.
Jarys barysynda BI Hockei Team, Qutqarushy, Bauerlar, Orda klýbtary ózara jeńimpazdy anyqtaıtyn bolady.
Uıymdastyrýshylardyń aıtýynsha, bul Asqar Zabıkýlındi eske alýǵa arnalǵan alǵashqy sporttyq saıys emes. Buǵan deıin voleıbol, fýtbol týrnırleri de únemi ótip turǵan.
Sondaı-aq memleket tarapynan 2023 jyly «Qaharman» atty serıal da túsirildi.
Aıta keteıik, 2022 jyly Astana qalasy Tótenshe jaǵdaılar departamenti órt sóndirý jáne apattyq-qutqarý jumystary qyzmeti jedel kezekshisiniń kómekshisi Asqar Zabıkýlın órt sóndirý kezinde 3 adamnyń ómirin qutqarǵanmen, alǵan aýyr jaraqatynan 20 qarasha kúni aýrýhanada kóz jumǵan.
