Astanada hokkeıden 2019 jylǵy Álem chempıonatynyń bıletteri satyla bastady
ASTANA. QazAqparat - Búgin shaıbaly hokkeı boıynsha 2019 jylǵy Álem chempıonatynyń matchtaryna arnalǵan bıletterdiń onlaın-satylymy bastaldy, dep habarlaıdy QazAqparat tilshisi «SPORTINFORM» SAA-ǵa silteme jasap.
Bıletter onlaın-satylym servısinde qoljetimdi bolady. Bıletke qol jetkizý úshin jankúıer barǵysy keletin matchty, sodan keıin sektory men qatary, orynyn tańdap alýy kerek. 2019 jylǵy Álem chempıonatynyń uıymdastyrýshy komıteti bılettiń baǵasy Qurlyqtyq hokkeı lıgasyndaǵy «Barys» matchiniń baǵasynan artyq bolmaıtynyn habarlaıdy.
«Sáýir aıynan bastap Astanada bıletterdi QHL matchtarynyń bıletteri satylatyn oryndardan, «Barys Arena» kassasynan satyp alýǵa bolady. Bılettiń baǵasy «Barystyń» ádettegi matchtarynan qymbat bolmaıdy. ıAǵnı, Qazaqstan quramasynyń qatysýymen ótetin matchtardaǵy bılet baǵasy 700 teńge bolmaq. Al qalǵan komandalardyń oıyndaryna bılet baǵasy 4 myń teńge. 7 jasqa deıingi balalarǵa kirý tegin. Múmkindigi shekteýli jandar da tegin kire alady. Tek aldyn ala 2019wmia@icehockey.kz poshtasyna ótinim jiberý kerek», - deıdi 2019 jylǵy álem chempıonatynyń uıymdastyrýshy komıtetiniń ókili, Qazaqstan hokkeı federatsııasynyń bas hatshysy Gleb Karataev.
Shaıbaly hokkeı boıynsha Álem chempıonaty Astanada 2019 jyldyń 29 sáýiri men 5 mamyry aralyǵynda ótedi. Álemdik hokkeı dodasynda Belarýs, Majarstan, Slovenııa, Ońtústik Koreıa, Lıtva jáne Qazaqstan quramalary ózara baq synasady. Oıyndardyń qorytyndysy boıynsha eń kóp upaı jınaǵan qos qurama joǵarǵy dıvızıonǵa joldama alyp, Shveıtsarııada 2020 jyly ótetin Álem chempıonatyna attanady.
Bizdiń el tuńǵysh ret hokkeıden Álem chempıonatyn ótkizgeli otyr. Jarysty ótkizý quqyǵyn Qazaqstan ótken jyly Halyqaralyq hokkeı federatsııalary kongresinde (IIHF) alǵan bolatyn. Barlyq federatsııalar biraýyzdan Qazaqstannyń ótinimin maquldaǵan edi.
2019 jylǵy Álem chempıonatynyń matchtary 12 myń kórermen sııatyn «Barys Arenada» ótedi.
