Astanada «Haziret Sultan» meshitiniń órtenýi kezinde bir er adam kóz jumdy

Bul týraly «QazAqparat» tilshisine Astana qalasynyń Tótenshe jaǵdaılar departamenti baspasóz qyzmetiniń bas mamany Bıbigúl Esmaǵambetova habarlady.

Qazirgi ýaqytta órttiń oshaǵy joıylǵanymen, ol tolyǵymen aýyzdyqtalǵan joq. Budan buryn, QR Tótenshe jaǵdaılar mınıstri V.Bojko aqparattyq agenttikterge bergen suhbatynda órt 300 sharshy metr aýmaqqa taralǵandyǵyn habardar etken bolatyn. Tilsiz jaýdy aýyzdyqtaýǵa TJD-niń barlyq garnızondary tartyldy. Aldyn ala boljam boıynsha, órt dánekerleý jumystary barysynda tutanǵan. Tótenshe jaǵdaı týraly habar saǵat 15.19-da túsken, órt sóndirýshiler oqıǵa ornyna 10 mınýttan soń jetti.

Aıta keteıik, osy kúnge deıin meshittiń qurylysy 90 paıyzǵa aıaqtalyp, tek oıý-órnek, boıaý jaǵý, dekoratıvti jumystar ǵana qalǵan bolatyn. 3 qabattan turatyn meshitte neke qııý zaly, ashana, tehnıkalyq bólmeler, ımamdardyń kabınetteri ornalasatyn bolady. 5000 adamǵa eseptelgen dinı mekemeniń aýdany 18 myń sharshy metrdi quraıdy. Al nysannyń alyp jatqan jalpy aýmaǵy - 12 gektarǵa jýyq. Meshittiń kúmbezi Qazaqstan boıynsha eń úlken dep aıtýǵa bolady. Onyń dıametri 28 metrden astam. Al bıiktigi 52 metrdi quraıdy. Nysannyń 4 munarasynyń bıiktigi 77 metrge teń.