Astanada «Han qalada - Han doıby» atty jarys ótti
ASTANA. Qazannyń 11-i. QazAqparat. Elordalyq «Astana» jýrnaly qalalyq bilim basqarmasynyń qoldaýymen 9-qazanda № 59 mektep-lıtseıde Astana kolledjderi men mektepterinde oqıtyn Nursultan esimdi oǵlandardyń arasynda «Han qalada - Han doıby» atty jarys uıymdastyrdy.
Este joq eski zamandarda handar ermektep, oı júırigin shaldyrǵan oıyndy jańǵyrtýshy - Ánýar Qabdoldauly degen azamat.
Ánýardyń aıtýynsha,Han doıbysynyń ǵajaıyby - onyń kestesinde. Onda astronomııalyq ilimnen bastap fılosofııa, ekonomıka, ǵylym, mádenıet, saıasat, memleket qurý júıesi, demokratııa, kapıtalızm sııaqty taǵy basqa san alýan sala bir tuǵyrda toǵysady. Kestesi qazaqtyń oıý-órnekterimen naqyshtalǵan. Al taqtadaǵy ortaq fıgýra - qazaqtyń kıiz úıi. Kıiz úıdiń syrtyndaǵy oıý-órneginiń, shańyraǵynyń túsi arqyly olardyń ataq-dárejesin, naqtylaı aıtsaq hany men qarashasyn, bıi men batyryn anyqtaýǵa bolady. Oıynnyń tórelegi de ádil. Jeńgeni erýlik alyp, han bolyp el suraıdy, jeńilgeni aıybyna jurtynyń bıligin beredi. Tańǵaldyratyny, júristiń sharty boıynsha japonnyń túımeleri (Go), úndiniń shahmaty, qytaıdyń patshalyq saıysy doıbylaryndaı (Halma) qarsylasyńdy ımperııalyq-qaǵanattyq júıemen tup-tuqııanymen qurtýǵa jol berilmeıdi, qaıta jeńilgendi moıyndatyp, el bolyp qosylýǵa jol beredi. Mine bul, baıyrǵy handyq júıeniń demokratııalyq qaǵıdasy.
Han doıbysy Astana jurtyna resmı tanystyrylyp otyrǵany osy. Birneshe kúnge sozylǵan irikteý týrynan ótip, oıyndy jete meńgergen segiz Nursultan aqtyq synda kópshiliktiń aldynda baq synady. Olar tek oınap qana qoıǵan joq, beınekamera aldynda oıynnyń erejesin túsindirip, beıhabar jurtshylyqqa qolma-qol túsindirip berdi. Oıyn nátıjesinde, birinshi oryndy - Á. Marǵulan atyndaǵy № 40 mektep oqýshysy Nursultan Júsipbek, ekinshi oryndy - № 5 gımnazııa oqýshysy Nursultan Bıjan, úshinshi oryndy - № 24 mektep oqýshysy Nursultan Tolaǵaev ıelendi. Qatysýshylardyń bárine «Astana» jýrnalynyń, QR Bilim jáne ǵylym mınıstrliginiń, «Astana» saýda úıiniń, «Rýhanııat» ortalyǵynyń baǵaly syılyqtary tartý etildi.
