Astanada halyqaralyq jastar shyǵarmashylyǵy festıvali máresine jetti (FOTO)
ASTANA. QazAqparat - Búgin Astana qalasynyń Beıbitshilik jáne kelisim saraıynda Uly Otan soǵysyndaǵy Jeńistiń 70-jyldyǵyna arnalǵan «Jeńis joldarymen» halyqaralyq jastar shyǵarmashylyǵy festıvaliniń gala-kontserti ótti.
Gala-kontsertke qurmetti qonaqtar retinde Astana qalasyndaǵy Uly Otan soǵysynyń jáne eńbek ardagerleri shaqyryldy. Oǵan «Jeńis joldarymen» festıvaliniń óńirlik irikteý týrlarynyń jeńimpazdary, onyń qatarynda Qazaqstannyń jáne TMD elderiniń joǵarǵy oqý oryndarynyń stýdenttik hor jáne bı ujymdary, jekelegen oryndaýshylar, mánerlep oqýshylar qatysty. Kontsertte 250-den astam jas daryn óz ónerlerin kórsetti.
Gala-kontsert halyqaralyq shyǵarmashylyq alańy bolyp tabylady. «Kórkem sóz» nomınatsııasy boıynsha Bishkek, Omby jáne Astana qalasynyń mánerlep oqýshy jastary óz tilderinde monolog oqydy. Astana qalasynyń bı ujymy Qyrǵyzstan men Qazaqstannyń eki horeografynyń birlesken avtorlyq jumysyn iske asyrdy. Qazaqstandyq JOO-nyń stýdenttik horynyń jınaqtaýymen Baký, Mınsk jáne Sankt-Peterbor solısterinen erekshe shyǵarmashylyq alıansy quryldy. Kesh qonaqtary úshin soǵys jyldaryndaǵy ataqty ánder shyrqalyp, sahnada tanys obrazdar kórsetildi. Sondaı-aq, kontsertke qazaqstandyq shyǵarmashylyq birlestikteri de qatysty.
Aıta keteıik, «Jeńis joldarymen» halyqaralyq jastar shyǵarmashylyǵy festıvaliniń uıymdastyrýshysy - Qazaqstan Respýblıkasynyń Bilim jáne ǵylym mınıstrligi.
