Astanada Halyqaralyq jańa tehnologııalyq ýnıversıtetiniń bazasynda ІT-jýrnalıster daıyndalady - Baılanys jáne aqparat mınıstri
ASTANA. Maýsymnyń 3-i. QazAqparat /Gúlnár Jandaǵulova/ - Aǵymdaǵy jyldyń qyrkúıek aıynda Halyqaralyq jańa tehnologııalar ýnıversıtetinde «ІT-jýrnalıstıka» mamandyǵy ashylady. Bul týraly beısenbi, maýsymnyń 3-inde Baılanys jáne aqparat mınıstri Asqar Jumaǵalıev óz blogynda málim etti.
Ótken demalys kúni mınıstr A.Jumaǵalıev Bas redaktorlar klýbynyń múshelerinen kezdesken bolatyn. Sol kezdesýde otandyq buqaralyq aqparat quraldarynyń damýyna kedergi bolyp otyrǵan problemalar talqylandy Bul atalmysh taqyrypty arqaý etken úshinshi kezdesý boldy. Jańa qyzmetke taǵaıyndalǵannan beri A.Jumaǵalıev naýryz jáne sáýir aılarynda respýblıkalyq jáne aımaqtyq basylymdardyń redaktorlarymen kezdesken edi.
Úshinshi kezdesýde buqaralyq aqparat quraldarynyń sapa máselesi, sondaı-aq shyǵarmashylyq redaktsııalardyń qyzmetkerleriniń sheberlik deńgeıleri sóz boldy.
A.Jumaǵalıevtiń aıtýynsha, mınıstrlik bul máseleni memlekettik buqaralyq aqparat quraldarynyń basshylarymen talqylap shyǵyp, jýrnalıster, operatorlar men rejısserler, salanyń basqa da qyzmetkerlerin kásibı oqytý kýrstaryn josparlap otyr. «Problema jýrnalıstıka fakýltetterindegi bilimniń sapasynda bolyp tur»,- dep sanaıdy redaktorlar.
Redaktorlardyń aıtqanymen kelisken mınıstr, degenmen, ýnıversıtettiń tek bazalyq bilim beretinin, al kásibılik tájirıbemen keletinin, kóp másele jas mamannyń ózine, onyń bilimin jetildirýge degen ynta-yqylasyna baılanysty ekenin aıtty.
«Mysaly, aǵymdaǵy jyldyń qyrkúıek aıynda Halyqaralyq jańa tehnologııalar ýnıversıtetinde «ІT-jýrnalıstıka» mamandyǵy ashylady, bul oqý baǵdarlamasy Karnegı Mellon ýnıversıtetimen birlesip jasalyp otyr» - dep habarlady mınıstr.
«Mundaı pánniń paıda bolýy - ýaqyt talabynan týyndap otyrǵan qajettilik. Jurtshylyqtyń jańa tehnologııalarǵa degen yqylasy, ınternet-basylymdardyń tanymaldyǵy kún saıyn artyp keledi - bul jalpy álemge tán úrdis», dep túıindedi óz sózin mınıstr Asqar Jumaǵalıev.
