Astanada halyqaralyq TEATRALL festıvali ashyldy
Festıvalge 6 elden kelgen 14 teatr qatysyp jatyr. Atap aıtsaq, Q.Qýanyshbaev atyndaǵy memlekettik akademııalyq qazaq mýzykalyq drama teatry, Abaı atyndaǵy Semeı memlekettik qazaq mýzykalyq drama teatry, Sank-Peterbýrg kameralyq «TOK» teatry, Astana qalasynyń «Jastar» teatry, Mahtýmkýlı atyndaǵy Túrikmenstan mýzykalyq-drama teatry, Ózbekstan Respýblıkasynyń Djızak mýzykalyq teatry jáne Geıdar Alıev atyndaǵy Tbılısı Ázerbaıjan drama teatrlarynyń ártisteri óner kórsetedi.
«Sizderdi Respýblıka kúnimen quttyqtaǵym keledi. Halqymyzǵa amandyq tileımin. Osyndaı keń ǵımaratta teatr festıvali ótedi. Biz bul oqıǵanyń ulttyq merekemen sáıkes kelgenine óte qýanyshtymyz. Búgin bizben birge festıvalge belgili akter, rejısser Asanáli Áshimov, elorda ákimi Altaı Kólginov qatysyp otyr. Sonymen qatar, shara aıasynda Ázerbaıjan Mámbetovtiń ómiri men shyǵarmashylyǵyna arnalǵan tsıfrlyq formattaǵy kórme uıymdastyryldy. Onda elektrondyq nusqada óner tulǵasynyń ómir jolynan syr shertetin jádigerler ornalastyrylǵan», - dedi Á.Mámbetov atyndaǵy drama jáne komedııa teatrynyń dırektory Tursynbek Qabatov.
Sondaı-aq, festıvaldiń ashylýymen shahar qonaqtaryn Astana qalasynyń ákimi Altaı Kólginov quttyqtady.
«Búgin biz jaqyn jáne alys shetelderden kelgen qonaqtardy, óner súıer qaýymdy qarsy alyp otyrmyz. Búgin teatrdyń damýyna baǵa jetpes úles qosqan rejısserimiz Ázerbaıjan Mámbetovti ulyqtaımyz. Barshańyzdy festıvaldiń ashylýymen quttyqtaımyn. Sondaı-aq Respýblıka kúnimen quttyqtaımyn», - dedi qala ákimi.
Elordalyq mádenıet basqarmasynyń basshysy Sanat Shapashov festıvaldiń maqsaty - teatrǵa kelýshilerdiń sanyn arttyrý ekendigin atap ótti. Atalǵan shara osymen ekinshi jyl uıymdarylyp otyr.
«Shyn máninde, bılet baǵasy sonshalyqty qymbat emes. Keıbir teatrlardyń qoıylym quny tipti 500 teńge. Birinshi mindet - teatrǵa kórermender tartý. Pandemııadan keıingi kezeńde biz adamdardyń kóńil-kúıin kóterip, teatrlardyń damýyna yqpal etkimiz keldi. Osy maqsatty bizge Ázerbaıjan, Grýzııa, Ózbekstan, Reseıden qonaqtar keldi. Sondaı-aq, olardyń arasynda osy ónerdiń synshylary da bar», - dep túıindedi Sanat Shapashov.
Teatr aptalyǵynyń saltanatty ashylýynda kórermenderge Q.Qýanyshbaev atyndaǵy Memlekettik akademııalyq qazaq mýzykalyq-drama teatrynyń «Ǵasyrdan da uzaq kún» spektakli usynyldy. Sondaı-aq, kórermender Ázerbaıjan Mambetov rejısserlik etken spektaklderdi tamashalaı alady. Festıvaldiń saltanatty jabylýy 30 qazanǵa josparlanǵan. Shara Ázerbaıjan Mámbetov atyndaǵy Qazaq memlekettik drama jáne komedııa teatrynda, Q.Qýanyshbaev atyndaǵy Memlekettik akademııalyq qazaq mýzykalyq-drama teatrynda jáne Jas kórermen mýzykalyq teatrynda ótedi.