Astanada Halyqaralyq sáýletshiler kongresi ótedi

ASTANA. QazAqparat - 16 shilde kúni elordadaǵy «Táýelsizdik saraıynda» QR Mádenıet jáne sport mınıstrligi Astana qalasynyń ákimdigi men Qazaqstan Respýblıkasy Sáýletshiler odaǵymen birlese Halyqaralyq sáýletshiler kongresiniń ashylý rásimin ótkizedi.

Halyqaralyq sáýletshiler kongresin Qazaqstan Repýblıkasynyń elordasynda ótkizý Astana qalasynyń 20 jyldyǵyn merekeleý aıasynda oraılastyryldy. Zamanaýı dúnıejúzilik sáýlet óneriniń álemdik trendteri,onyń arhıtektýralyq kelbeti - elordanyń aıshyqty ereksheligi. Álbette, bul álemge áıgili sáýletshiler men sáýlet óneriniń otandyq maıtalmandarynyń shyǵarmashylyǵyndaǵy úndestik nátıjesi.

«Rýhanı jańǵyrý» baǵdarlamasyn iske asyrý, qazaqstandyq qoǵamdy jańǵyrtý jaǵdaıynda elimizdiń qalalary men eldi mekenderiniń áleýmettik ortasyn odan ári damytý, sondaı-aq jetildirý máselesi týyndap otyr. Óz kezeginde Astana elorda retinde elimizdiń mádenı bet-beınesin kórsetedi. Astananyń elorda retindegi kelbeti ǵasyrlar boıy saqtalatyndaı qalyptastyrylyp, sáıkesinshe ony damytý úshin erekshe oılastyrylǵan sáýlettik ıdeıalar men sheshimder qajet. Alaıda álemdik sáýlet ónerindegi jetistikterge beıimdelý ulttyq dástúrlerdiń joǵalýyna ákelmeýi tıis.

Kongress maqsaty: kásibı tájirıbe almasý, álemdik sáýlet óneriniń damýynyń kontseptýaldyq-teorııalyq baǵyttarymen jáne onyń negizgi úrdisterimen tanysý. Sonymen qatar qazaqstandyq jáne sheteldik jetekshi sáýletshilermen shyǵarmashylyq baılanystar ornatý, sáýlet ónerindegi ulttyq mádenıettiń úzdik dástúrlerin saqtaı otyryp, progressıvti álemdik tájirıbe men bilimdi qabyldaý qabilettiligin  qalyptastyrý arqyly zamanaýı otandyq sáýlet ónerin damytý,

Kongress aıasynda «Qalalyq orta: dástúri men keleshegi» taqyrybynda halyqaralyq ǵylymı-praktıkalyq konferentsııa ótedi. Konferentsııada plenarlyq otyrys pen 2 paneldik sessııa ótkizý qarastyrylǵan.

Sonymen qatar «Qundylyqtardy sıntezdeý. Jahandyq kontekstegi lokaldyq sáıkestik» taqyrybynda «dóńgelek ústel» otyrysy ótkizilmek.

Jas sáýletshiler, sonymen birge stýdentter startap ýıkend formatynda ótkiziletin «Qalalyq  orta: «Aqyldy» aýdan» baıqaýyna qatysa alady.

Kongress aıasynda sheberlik sabaqtary, sheteldik tanymal sáýletshilerdiń dáristeri, «Ortany qalyptastyratyn  kim?» taqyrybynda dıalog alańyn ótkizý josparlanǵan.

Kongreske alys jáne jaqyn shetel sáýletshileri, úkimet pen bıznes ókilderi, elimizdiń barlyq oblystary men respýblıkalyq mańyzy bar qalalarynan (Astana, Almaty, Shymkent) otandyq sáýletshiler; developerler, tehnologııalyq kompanııalar, jobalaý bıýrolary, ınjener-jobalaýshylar, sýretshiler qatysady.

Onyń jumysy 18 shildege deıin jalǵasady dep kútilýde.