Astanada halyqaralyq deńgeıdegi SABIS mektebi ashylady
Búgin ákimdikte qala ákimi Baqyt Sultanov, Bilim jáne ǵylym mınıstri Kúlásh Shamshıdınova jáne BAÁ Qazaqstandaǵy Tótenshe jáne ókiletti elshisi Mohammad Ahmad Aldjaberanyń qatysýymen bilim berý salasyndaǵy jobalardy damytý máseleleri boıynsha dóńgelek ústel ótti. Іs-sharaǵa Syrtqy ister mınıstrliginiń ınvestıtsııalar jónindegi komıtetiniń, Astana qalasy ákimdiginiń, ««ASTANA INVEST QIDO»JShS, qazaqstandyq jáne sheteldik kompanııalardyń ókilderi qatysty. Іs-shara aıasynda SABIS halyqaralyq mektebin salýǵa qol jetkizildi. Bilim salasyndaǵy bul ınvestıtsııa aıasynda 1 myń oryndyq mektep pen 250 orynǵa arnalǵan mektepke deıingi bilim oshaǵy ashylady.
SABIS halyqaralyq mektepter jelisi álem boıynsha 20 elde bar. Jańa halyqaralyq mekteptiń qurylysy qaladaǵy mektepter júktemesin azaıtyp, jańadan 200 jumys ornynyń ashylýyna múmkindik bermek.
«Qalanyń qarqyndy ósip jatqanyn eskersek, jańa oqý oryndaryn ashý óte mańyzdy. Biz aldaǵy bes jylda 120 myń oqý ornyn ashýdy josparlap otyrmyz. Bul - qazirgiden eki ese artyq kórsetkish. Sonyń ishinde sheteldik jáne elimizdiń ınvestorlary esebinen 20 myń oryndyq jekemenshik mektep ashýdy josparlap otyrmyz. Jeke ınvestorlardyń esebinen osyndaı jobalardyń júzege asatynyna biz qýanyshtymyz», - dedi Baqyt Sultanov.
Ákim aıtyp ótkendeı, bilim sapasyn kóterý maqsatynda Elbasynyń bastamasymen keıbir aımaqtarda sonyń ishinde, Astanada jan basyna shaqqandaǵy qarjylandyrýdy engizý arqyly mektepterdi damytý jóninde qosymsha sharalar júzege asyryldy. Jan basyna shaqqandaǵy qarjylandyrý júıesinde bilim berý salasyna jeke bıznesti tartýǵa múmkindik qarastyrylǵan. 
«Bul - Astana men SABIS úshin tarıhı sát. Biz Astanaǵa ózimizdiń 130 jyldyq tájirıbemizben jáne sizderdiń «2050» strategııalaryńyzdyń bir bólshegi bolyp kelemiz», - dedi «SABIS Group» vıtse-prezıdenti Vıktor Saad.
Sondaı-aq, dóńgelek ústel aıasynda otandyq bes ınvestormen Astanada 17,4 mlrd teńgeden astam ınvestıtsııa kóleminde jańa jekemenshik mektepter qurylysy boıynsha kelisim jasaldy.
Aıta keteıik, Astana - Qazaqstanda balalardy mektepke deıingi bilimmen qamtý maqsatynda jekemenshik balabaqsha salý boıynsha memlekettik tapsyrysty engizgen alǵashqy qala. Elorda ákimdigi bilim berý salasyn ári qaraı damytýdy josparlap otyr. Bul sharalar jeke ınvestıtsııa tartý arqyly júzege asyrylmaq. Astana qalasy ákiminiń orynbasary Malıka Bekturovanyń aıtýynsha, SABIS mektep qurylysynyń birinshi kezeńin qarjylandyrýdyń ózi 15,5 mıllıon dollardy quryp otyr.
«Bul - júz paıyz jeke ınvestıtsııa. Bizdiń taraptan qurylys salý úshin jer ýchaskesi zattaı grant túrinde usynyldy, ıaǵnı ınvestıtsııalyq kelisimshart aıasynda tegin. Bul - elimiz boıynsha bilim salasynda mektep salýǵa arnalǵan zattaı grant usynylǵan alǵashqy kelisimshart. Qurylys osy jyly bastalyp, 2022 jyly tolyq aıaqtalady», - dedi Malıka Bekturova.
Búgin qol qoıylǵan qujattar negizinde salynatyn ózge de jekemenshik mektepter 100% jeke ınvestorlar esebinen júzege asyrylatyn joba bolyp tabylady. Malıka Bekturovanyń aıtýynsha, jekemenshik mektepter jan basyna shaqqandaǵy qarjylandyrý júıesi arqyly jartylaı nemese tolyǵymen memlekettik tapsyryspen jumys jasaýy múmkin.
«Mektepke kelgen ár oqýshy avtomatty túrde memleket tarapynan qarjylandyrylady. Qazir salynyp jatqan jekemenshik mektepter osy júıege qyzyǵýshylyq tanytatyny sózsiz. Keı mektepter jartylaı aqyly, al keıbiri tolyǵymen tegin bolady. Ol mekteptiń bilim sapasyna jáne salynǵan qarjyny qaıtarýdyń jolyna baılanysty. Biz aqyly mektepterge de jáne memlekettik tapsyryspen jumys jasaǵysy keletin mektepterge de múmkindik beremiz. Qazir eki mektepke de suranys bar», - dedi M. Bekturova.
