Astanada Halyqaralyq áıelder kúnine oraı merekelik kontsert ótti
ASTANA. 3 naýryz. QazAqparat /Aınur Kenebaeva/ - Búgin Astana qalasy ákimdiginiń uıymdastyrýymen Kongress-Hollda 8 naýryz - Halyqaralyq áıelder kúnine oraılastyrylǵan merekelik kontserttik baǵdarlama bolyp ótti.
Atalmysh merekelik kontsert saltanatty túrde áıelderdiń qoǵamdaǵy aıryqsha ornyn, otbasyndaǵy mańyzyn jáne barlyq salalardaǵy belsendi qyzmetin jan-jaqty aıǵaqtaıtyn taqyryptardy arqaý etken maǵynaly mánimen erekshelendi.
Kontsert barysynda áıeldi ana retinde asqaqtatqan áserli óleńder oqylyp, kórkem kórinisterden «Áıel-Ana» obrazy jasaldy. Elimizdiń belgili ánshileriniń oryndaýyndaǵy ana taqyrybyndaǵy ásem án áýenderi názik jandy arýlardy aıryqsha tebirenisti kúıge bóledi.
Ázil-ospaqpen jáne qaljyńmen kómkerilgen qoıylymdar arqyly da áıelder ómiriniń shynaıy beınesi jasalyp, áıel zatynyń aıaýly ana, adal jar, jaýapty qyzmetker ári laýazymdy basshy retindegi aıryqsha róli kórsetildi.
Atalmysh shara qoǵamnyń áıelderge degen aıryqsha qurmetin aıǵaqtaıtyn saltanatty ıgi bastama boldy.
Shara barysynda áıelder qaýymyna gúl shoqtary men baǵaly syılyqtar tabys etildi.
