Astanada halyq sanyn shekteý durys dep oılaımyn – Tamara Dúısenova

ASTANA. QazAqparat – QR Eńbek jáne halyqty áleýmettik qorǵaý mınıstri Tamara Dúısenova elordada halyq sanyn shekteý bastamasyn qoldaıtynyn, munda ınfraqurylymǵa basa mán berý keregin aıtty, dep habarlaıdy QazAqparat tilshisi.

Keshe áleýmettik jelide QR Eńbek jáne halyqty áleýmettik qorǵaý mınıstrligi kóshi-qon komıtetiniń tóraǵasy Asqarbek Ertaevtyń málimdemesi taraǵan edi.

Ol Astanaǵa kóship kelýshiler sanyna shekteý qoıylatynyn, kóshi-qon aǵyny baqylaýǵa alynatynyn aıtqan.

Tıisti zań jobasyn elorda ákimdigi daıyndap jatyr.

«Qazirgi tańda bul másele durys shyǵar dep esepteımin, sebebi elordada mektep, medıtsına, jalpy áleýmettik ınfraqurylym daıyn emes. Eger áleýmettik ınfraqurylym, daıyn bolsa, qajetti múmkindikter bolsa, árıne kóbeıtýge bolady. Sondyqtan, qazirgi ýaqytta Astana qalasyndaǵy jalpy ınfraqurylymdy esepke ala otyryp, muny durys sheshim dep esepteımin. Mysaly bir úıde 5-6 otbasy turyp jatyr, áleýmettik jaǵdaı nashar. Qala sonsha azamatty mektepke qabyldaı ala ma, emhanaǵa qabyldaı ala ma, sol jaǵyn oılaý kerek», - dedi Tamara Dúısenova Úkimet kýlýarynda.

Onyń aıtýynsha, qazir Astana qalasynda 1 mıllıonnan asa adam turyp jatyr. Burynǵy Aqmola qalasy 300 myń adamǵa ǵana eseptelgen edi.

«Eger Astananyń kólemi keńeıip, múmkindikter jasalsa, ásirese, áleýmettik ınfraqurylym salynsa, onda ashýǵa bolady. Qazir ýaqytsha osyndaı sheshim qabyldaýǵa týra keledi. Oqýǵa kelgender, jumys isteýge kelgender bar. Mysaly, jumys berýshiler olardy jumysqa shaqyryp, úımen nemese jataqhanamen qamtamasyz etse, esh shekteý bolmaıdy. Halyqaralyq tájirıbede de mundaı máseleler bar. Munda AQSh astanasy Vashıngton qalasynyń standarttaryn aıtýǵa bolady. Frantsııanyń ár qalasyna berilgen standart bar. Bir nárseni túsineıik, eshkim eshteńege kedergi keltirip jatqan joq. Ár qalanyń óz ınfraqurylymy bar. Shymkent, Almaty qalalarynda da týra sondaı jaǵdaı boldy. Másele – azamattardyń áleýmettik jaǵynan durys múmkindik alýy», - dep túsindirdi mınıstr.