Astanada halyq kóp jınalatyn nysandarǵa qatań tekserý júrgiziledi
ASTANA. QazAqparat - Astana ákimdigi halyq kóp jınalatyn saýda jáne oıyn-saýyq, mádenı-sporttyq, bilim berý jáne densaýlyq saqtaý nysandaryna qatań tekserý júrgizedi, dep habarlaıdy QazAqparat tilshisi.
Atalǵan tekserý jumystaryn qala ákimi Áset Isekeshev óz baqylaýyna aldy.
«Kesheden bastap, qala ákimi Áset Isekeshevtiń arnaıy tapsyrmasymen halyq kóp jınalatyn qoǵamdyq oryndarda tekserý júrgizý jumystary bastaldy. Astanadaǵy úsh aýdan ákimdikterinde arnaıy komıssııa quryldy, olar óz aýmaqtaryndaǵy nysandardy tolyǵymen tekseredi. Arnaıy komıssııalar qurylyp, oqý-jattyǵýlar, operatıvtik-profılaktıkalyq is-sharalar atqarylady. Bul jumystardy Áset Isekeshev óz baqylaýyna aldy», - dep málimdedi Astana qalasy ákimdiginiń resmı ókili Elvıra Júrgenbaeva Astana ákimdiginde ótken baspasóz máslıhatynda.
Baspasóz hatshysynyń aıtýynsha, Astana qalasy boıynsha 117 saýda orny tirkelgen. Odan bólek, qala ishinde adam kóp shoǵyrlanatyn 200 iri qonaqúı, 60 hostel jáne 600-den astam tamaqtanatyn oryndar bar.
Sonymen birge Astanada 60-tan astam densaýlyq saqtaý oryndary, 300 mektepke deıingi mekeme, 100 mektep, 10 arnaıy bilim berý mekemeleri jáne 50 kolledj ben joǵary oqý oryndary bar.
«Astana boıynsha órt nemese tótenshe jaǵdaılardyń aldyn alý sharalary keshe nemese búgin bastalǵan joq. Jyl saıyn arnaıy komıssııa nysandarǵa tekserý-tergeý jumystaryn júrgizedi. Ásirese densaýlyq saqtaý jáne bilim berý ortalyqtaryna erekshe kóńil bólinip, arnaıy tekserý jylyna birneshe ret júrgiziledi», - dep atap ótti E. Júrgenbaeva.
Onyń aıtýynsha, bıyl naýryz aıynan bastap, Astananyń 70-ke jýyq bilim berý oryndary tekserilgen. Tekserý jumystaryna qalalyq TJ deparatmenti, ákimdiktegi jaýapty mamandar jáne ata-analar da qatysqan. Mamyr aıynyń sońyna deıin barlyq bilim ordalaryna tekserý júrgizý josparlanǵan.
Tekserý jumystarynan bólek, naýryz aıynda mektepter men balabaqshalarda jasóspirimder men balalarǵa tótenshe jaǵdaıdaǵy is-qımyl boıynsha oqý-jattyǵý jumystary júrgizilgen.
Densaýlyq saqtaý mekemelerinde de jyl basynan beri 25 nysan tekserýden ótken. Nátıjesinde órttiń aldyn alýdy oryndamaý, qajetti quraldardyń bolmaýy syndy túrli deńgeıdegi 139 ereje buzý anyqtalyp, 9 laýazymdy tulǵa ákimshilik jaýapqa tartylǵan.
Qalalyq densaýlyq saqtaý basqarmasyna qarasty 38 densaýlyq saqtaý mekemesi bar. Onyń 37-i boıynsha TJ deparatmentinen órt sóndirý aýdıti oń nátıje bergen.
Brıfıng barysynda resmı ókil Astana ákimdigi tarapynan qaýipsizdik erejesin buzǵandarǵa jazany kúsheıtý týraly usynys berilgenin atap ótti.
«Áleýmettik jelide halyq qaýipsizdik erejesin buzǵany úshin jaýapty tulǵalarǵa tek qana aıyppul salýdyń jetkiliksiz ekeni jazylýda. Osyǵan oraı, Astana ákimdigi tarapynan qaýipsizdik erejesi buzylyp, adam densaýlyǵyna qaýip tóngen jaǵdaıda saýda oryndary nemese bilim berý oshaqtarynyń basshylaryna taǵaıyndalatyn jazany qataıtý boıynsha usynys jasalady», - dep tolyqtyrdy sózin E. Júrgenbaeva.
Sondaı-aq, resmı ókildiń málimdeýinshe, kez kelgen ǵımarattaǵy qaýipsizdik talaptarynyń saqtalmaýy týraly jáıtter boıynsha Astana turǵyndary ákimdiktiń «109» qyzmetine aryz-shaǵym jibere alady.
Eske sala ketsek, 25 naýryz kúni Reseıdiń Kemerovo qalasynda «Zımnıaıa vıshnıa» saýda úıinde órt shyǵyp, sońǵy derekterge sáıkes 64 adam qaza tapty.
Memleket basshysy Nursultan Nazarbaev Reseı Federatsııasynyń Prezıdenti Vladımır Pýtınge kóńil aıtý jedelhatyn joldady.
Búgin QR Premer-Mınıstri Baqytjan Saǵyntaev elimizdiń Іshki ister mınıstrligine barlyq saýda ortalyqtarynda órt qaýipsizdigin tekserýdi tapsyrdy.
