Astanada halyq bıi ansamblderiniń halyqaralyq festıvali ótedi

ASTANA. QazAqparat - Maýsymnyń 29-nan shildeniń 1-ine deıin Astanada elimizdiń úzdik bı ujymdary III «Shashý» halyq bıi ansamblderiniń halyqaralyq festıvali ótedi, dep habarlaıdy QazAqparat elorda ákimdiginiń saıtyna silteme jasap.

Shara QR halyq artısi, keńestik jáne qazaqstandyq balet artısi jáne Zaýyrbek Raıbaevty eske alýǵa arnalǵan. Elordanyń 20 jyldyǵyna arnalǵan sharaǵa ózindik stıli men oryndaý tehnıkasy qalyptasqan kásipqoı ujymdar qatysady.

Atap aıtqanda, oraldyq «Nazerke», qyzylordalyq «Tomırıs», taldyqorǵandyq «Altynaı», pavlodarlyq «Nur» ansamblderi, sondaı-aq Altaı ólkesinen kelgen qonaqtar «Ogonkı», bashqurtstandyq «Sterlıtamdyq memlekettik halyq bıi ansambli», jáne t.b. qatysady.

Budan basqa, «Shashý» festıvalinde Astana qalasy ákimdiginiń Memlekettik akademııalyq fılarmonııasynyń «Shalqyma» halyq bıi ansambli óz ónerin ortaǵa salady. Ujymnyń kórkemdik jetekshisi mádenıet qaıratkeri Ábdirasýl Esekeev.

Sharany Astana qalasynyń mádenıet jáne sport basqarmasy, elordalyq fılarmonııa uıymdastyrady.

Festıval shymyldyǵy 29 maýsymda saǵat 19.00-de qalalyq alańda ashylady. Oǵan «Shalqyma» halyq bıi ansambli qatysady. Kelesi kúni alańda saǵat 18.00-den 20.00-ge deıin qonaqtar barlyq ujymdardyń qatysýymen ótetin eki saǵattyq «Bı álemi»kontsertin tamashalaıdy. «Shashý» festıvali 1 shildede Amfıteatrda «Bı shashý» gala-kontsertimen jabylady.