Astanada halyq ártisi Roza Jamanovany eske alýǵa arnalǵan kontsert ótedi

Bul týraly astana.kz saıtyna elorda ákimdiginiń Memlekettik fılarmonııasynan habarlady.

Erekshe daýys ıesi Roza Jamanova 1953 jyldan bastap Abaı atyndaǵy memlekettik akademııalyq opera jáne balet teatrynda jeke oryndaýshy retinde keremet kórkemdik beınelerdi somdaǵan. Ol opera spektaklderinde jetekshi partııalardy oryndaǵan: Aıda (Dj. Verdı «Aıda»), Vıoletta (Dj. Verdı «Travıatta»), Mımı (Dj. Pýchchını «Bogema»), Tatıana (P. Chaıkovskıı «Evgenıı Onegın»), Jibek (E. Brýsılovskıı «Qyz Jibek»), Ajar (A. Jubanov, L. Hamıdı «Abaı») jáne t.b.

Aıta keteıik, Roza Jamanovanyń esimi Qazaqstanda opera óneriniń gúldenýimen tyǵyz baılanysty. Ol otandyq jáne álemdik opera týyndylarynyń arııalaryn úlken sheberlikpen oryndap, ónersúıer qaýymnyń shynaıy súıispenshiligine bólendi.

Roza Jamanovany eske alýǵa arnalǵan kesh - bul onyń daryndylyǵyn moıyndaý, qurmetpen eske alyp, izet kórsetý.

Halyq ártisi Roza Jamanovany eske alý keshi 5 aqpanda saǵat 19:00 «Nazarbaev ortalyǵynyń» kontsert zalynda ótedi.