Astanada halyqaralyq jasandy ıntellekt olımpıadasy ótedi: bastamany Qazaqstannyń jetekshi kompanııalary qoldady
ASTANA.KAZINFORM - Tamyz aıynda Astana qalasy Halyqaralyq jasandy ıntellekt olımpıadasynyń (IOAI 2026) alańyna aınalady. Bilim men tehnologııa salasyndaǵy álem kútken iri dodalardyń birine 100 elden oqýshylar, tálimgerler men sarapshylar keledi.
Búginde olımpıadaǵa daıyndyq memlekettik ınstıtýttardy, bilim berý qaýymdastyǵyn jáne elimizdiń iri bıznes ókilderin ortaq maqsatqa jumyldyrdy. Aýqymdy is-sharanyń bas seriktesi Kaspi.kz boldy. Freedom Holding Corp. óziniń «Freedom Shapaǵat» korporatıvtik qaıyrymdylyq qory arqyly «Brıllıant» seriktes mártebesin ıelendi. Al Documentolog jáne Higgsfield AI kompanııalary «Altyn» seriktester qataryna qosyldy.
Jetekshi kompanııalardyń qoldaýy jobanyń aýqymyn keńeıtip qana qoımaı, bıznes qaýymdastyqtyń daryndy jastardy damytýǵa, ınjenerlik oılaý mádenıetin nyǵaıtýǵa jáne bolashaq tehnologııa kóshbasshylardy tárbıeleýge degen joǵary qyzyǵýshylyǵyn kórsetedi.
Qazirgi ekonomıkada adam kapıtalyn damytý aıryqsha mańyzdy. Osy turǵydan ınnovatsııa men zamanaýı tsıfrlyq damýdyń jarqyn úlgisine aınalǵan Kaspi.kz kompanııasynyń jobaǵa qoldaý bildirýi – qısyndy ári mańyzdy qadam.
– Qazaqstannyń Halyqaralyq jasandy ıntellekt olımpıadasy – IOAI 2026-ny qabyldaıtynyn zor maqtanyshpen atap ótemiz. Bul – álemdik deńgeıdegi mańyzdy oqıǵa ári qazaqstandyq mektep oqýshylary men stýdentteri úshin óz talantyn, bilimin jáne bıik maqsattaryn kórsetýge berilgen úlken múmkindik. Kaspi.kz óz ónimderi men servısterin mıllıondaǵan klıentter men júzdegen myń kásipker úshin barynsha yńǵaıly, qaýipsiz ári paıdaly etý maqsatynda jasandy ıntellekt tehnologııalaryn belsendi túrde damytyp, keńinen qoldanyp keledi. AI olımpıadasyn qoldaý – Qazaqstanda bolashaq tehnologııalardy jasaıtyn jańa býyn mamandaryn tárbıeleýge qosqan úlesimiz. Biz úshin jas qazaqstandyqtardyń zamanaýı tehnologııalardy tek paıdalanýshysy ǵana emes, olardy jasaýshysy bolýy mańyzdy. IOAI 2026 olımpıadasynyń bas seriktesi atanǵanymyzǵa qýanyshtymyz jáne Federatsııaǵa senim men seriktestik úshin alǵysymyzdy bildiremiz. Qazaqstan quramasyna jańa jeńister men tolaǵaı tabystar tileımiz! – dedi Kaspi.kz negizin qalaýshy jáne basshysy Mıhaıl Lomtadze.
Jańa býynnyń kásipkerlik jáne ınvestıtsııalyq oılaýyn damytý da asa ózekti baǵyttardyń biri. Bul baǵytty bilim salasyndaǵy jáne jastar bastamalaryn turaqty túrde qoldap kele jatqan Freedom Holding Corp. kompanııasynyń qoldaýy kúsheıte túsedi.
– Qazaqstan jahandyq tsıfrlyq transformatsııadan óziniń biregeı damý jolyn qalyptastyra aldy. Elimizde jasalǵan qolaıly jaǵdaılardyń arqasynda biz tek óz AI-tehnologııalarymyzdy damytyp qana qoımaı, halyqaralyq naryqtarǵa da shyǵyp jatyrmyz. Alaıda myqty mamandarsyz bul qarqyndy saqtap, básekede jeńiske jetý múmkin emes. Sondyqtan Freedom Holding úshin talantty mamandardy damytý men qoldaý ınfraqurylymdy damytý sekildi mańyzdy baǵyttardyń biri bolyp tabylady.. Biz dál osyndaı tásil arqyly ǵana Qazaqstan álemdik deńgeıdegi tsıfrlyq ónimder jasap, óńirdegi negizgi oıynshylardyń biri bola alady dep senemiz. IOAI 2026 olımpıadasyn qoldaý arqyly biz elimizdegi AI-qozǵalysty jedeldetip, jastarǵa osy bolashaǵy zor salada óz jolyn tabýǵa kómekteskimiz keledi, – dedi Freedom Holding Corp. bas atqarýshy dırektory Tımýr Týrlov.
Documentolog tarapynyń olımpıadaǵa qoldaý kórsetýi kompanııanyń jasandy ıntellektini damytýǵa jáne tehnologııalyq mamandardyń jańa býynyn daıarlaýǵa baǵyttalǵan strategııalyq fokýsyn kórsetedi. Documentolog – Qazaqstandaǵy avtomattandyrý naryǵynyń kóshbasshysy, d8n.ai mýltıagenttik AI-platformasynyń jáne memleket pen bıznesti tsıfrlandyrýǵa arnalǵan baǵdarlamalyq sheshimderdiń ázirleýshisi.
Olımpıadany qoldaýǵa Higgsfield AI kompanııasynyń qosylýy da erekshe mańyzdy. Jasandy ıntellekttiń jahandyq naryǵynda jumys isteıtin jańa býyn kompanııasynyń qatysýy Qazaqstannyń álemdik tehnologııalyq úderistermen tyǵyz baılanysyn aıqyn kórsetedi.
– Higgsfield kompanııasynyń negizin qalaýshylar – halyqaralyq olımpıadalardyń burynǵy qatysýshylary. Búginde bizdiń komandada osyndaı olımpıadalyq tájirıbesi bar ınjenerler men zertteýshiler jumys isteıdi. Biz mundaı jarystardyń qundylyǵyn jaqsy túsinemiz jáne tehnologııalar bolashaǵyn aıqyndaıtyn talantty jastardyń jańa býynyn qoldaýǵa qýanyshtymyz, – dep atap ótti kompanııa ókilderi.
Qazaqstan sporttyq baǵdarlamalaý federatsııasynyń basshysy Baǵdat Mýsın mundaı seriktesterdiń olımpıada tóńireginde toptasýy ulttyq tehnologııalyq ekojúıeniń kemeldengenin jáne ıntellektýaldyq sportqa qyzyǵýshylyqtyń artyp kele jatqanyn kórsetetinin aıtty.
– Búginde ıntellekt pen jastarǵa salynǵan ınvestıtsııa – eń senimdi damý strategııasy. Astanada ótetin Halyqaralyq jasandy ıntellekt olımpıadasy Qazaqstan talanttarynyń áleýetin álemge tanytyp, jahandyq tehnologııalyq bolashaqtyń bir bóligine aınalýǵa múmkindik beredi, – dedi ol.
IOAI 2026 olımpıadasynyń ótýi Qazaqstannyń bilimge, ınnovatsııaǵa jáne adam kapıtalyna basymdyq beretin memleket retindegi halyqaralyq bedelin odan ári nyǵaıtady.
