Astanada halyqaralyq vokaldyq baıqaýdyń jeńimpazdary anyqtaldy
ASTANA. KAZINFORM — Roza Baǵlanova atyndaǵy «Qazaqkontsert» memlekettik akademııalyq kontserttik uıymynda Roza Baǵlanova atyndaǵy halyqaralyq vokaldyq baıqaýdyń gala-kontserti ótti.
Mádenıet jáne aqparat mınıstrliginiń baspasóz qyzmeti málim etkendeı, saltanatty keshte ónerpazdar men baıqaý laýreattary sahna tórinde óner kórsetip, jeńimpazdar marapattaldy.
Baıqaýdyń bas júldesi Medet Orynbaevqa tabystaldy. Birinshi oryndy Merýert Jeldibaeva ıelense, ekinshi oryn Sáken Alımhanovqa buıyrdy. Úshinshi oryndy Elvıra Mamytova men Aıan Baıjigit bólisti.
Kesh shymyldyǵy Halyq qaharmany Roza Baǵlanovanyń repertýaryndaǵy áıgili «Ah, Samara-gorodok» halyq ánimen ashyldy. Keshke Qazaqstannyń eńbek sińirgen qaıratkeri Jeńis Ysqaqova, QR Mádenıet salasynyń úzdigi Perızat Turarova, halyqaralyq baıqaýlardyń laýreaty Asylhan Shalqarov jáne ózge de «Qazaqkontsert» ártisteri qatysty.
I, II jáne III dárejeli oryn ıegerlerine dıplomdar tabystalyp, ózge qatysýshylarǵa sertıfıkattar berildi.
Sonymen qatar Roza Baǵlanovanyń otbasy atynan Aınaz Rahımzade, Inna Troıan, Mýhaddas Alıeva jáne Gran-prı ıegeri Medet Orynbaevqa arnaıy syılyqtar tartý etildi.
«Qazaqkontsert» ártisteri men baıqaý laýreattary kópshilikke mazmundy baǵdarlama usyndy. Sahnada shyrqalǵan ánder arqyly qatysýshylardyń oryndaýshylyq sheberligi pash etildi. Keshte Roza Baǵlanovanyń repertýaryndaǵy tańdaýly týyndylar oryndalyp, ánshiniń mol shyǵarmashylyq murasy jas býynǵa keńinen dáripteldi.
Budan buryn pavlodarlyq «SAMIYAN» kvınteti Túrkııadaǵy óner baıqaýynda gran-prıge ıe bolǵanyn jazdyq.
