Astanada Halyqaralyq teatr kúnine oraı 7 teatrdyń jetistikteri jarııalandy
ASTANA. KAZINFORM – 27 naýryz – Halyqaralyq teatr kúni. Bul – tek mádenıet qyzmetkerleriniń kásibı merekesi emes, sonymen qatar qoǵam men óner arasyndaǵy baılanysty nyǵaıtatyn mańyzdy data. Elorda ákimdigi Astana teatrlarynyń tynysy men jetistikteri týraly derekti oqyrman nazaryna usynady.
Búginde Astana qalasy Mádenıet basqarmasyna qarasty 7 teatr jumys isteıdi. Olar: «Jastar teatry», «Naz» memlekettik bı teatry, Qýyrshaq teatry, M. Gorkıı atyndaǵy Memlekettik akademııalyq orys drama teatry, Ázirbaıjan Mámbetov atyndaǵy Memlekettik drama jáne komedııa teatry, Mýzykalyq jas kórermen teatry jáne «Qanattylar» ınklıýzıvti teatry.
2025 jyldyń basynan beri elordalyq teatrlar 1 164 qoıylym sahnalady, onyń 17-si – premera.
Mádenıet basqarmasynyń málimetinshe, kórermenniń teatrǵa degen qyzyǵýshylyǵy aıtarlyqtaı artyp, teatrǵa kelýshiler sany 30 paıyzǵa ósip, 306 995 adamdy qurap otyr. Qazirgi tańda teatrlardyń repertýarynda 199 qoıylym bar: onyń 88-i otandyq, 94-i sheteldik avtorlar shyǵarmalary boıynsha sahnalanǵan. Sonymen qatar 75 qoıylym balalarǵa, 124-i eresek kórermenge arnalǵan.
Elorda teatrlary shyǵarmashylyq jetistikterimen de erekshelenip keledi. Mýzykalyq jas kórermen teatry Dýlat Isabekovtiń «Gaýhartas» mýzykalyq dramasyn 300-ge jýyq ret sahnalap, Qazaqstan men Eýrazııa keńistiginde rekordtyq kórsetkishke jetti. Qoıylym «UMAI-2023» ulttyq syılyǵynda «Eń úzdik spektakl» atandy.
Ázirbaıjan Mámbetov atyndaǵy Memlekettik drama jáne komedııa teatrynda 2024 jyly Muhtar Shahanovtyń «Tanakóz» poetıkalyq dramasy qoıylyp, «Ticketon Awards-2024» nusqasy boıynsha «Jyldyń úzdik spektakli» atandy. Al 2025 jyly osy teatrda Tabyldy Dosymovtyń «Sáıgúlik» mýzykalyq dramasynyń premerasy ótip, «STEPPE AWARDS 2025» marapatynda «Jyldyń úzdik spektakli» atalymyn ıelendi.
M. Gorkıı atyndaǵy teatrda sahnalanǵan «Álııa» qoıylymy batyr Álııa Moldaǵulovanyń erligi arqyly patrıotızmdi dáriptese, Mýzykalyq jas kórermen teatrynda Uly Jeńistiń 80 jyldyǵyna oraı Mánshúk Mámetova týraly «Mánshúk» mýzykalyq dramasy kórermenge jol tartty.
Jumysshy mamandyqtar jyly aıasynda Á. Mámbetov teatry «Armandar oryndalady» jobasyn usynyp, túrli sala ókilderiniń ómirin sahnalady. Bul bastama eńbek adamdarynyń shyǵarmashylyq áleýetin kórsetýge baǵyttaldy.
Sonymen qatar elordalyq teatrlar jańa tehnologııalardy da ıgerip jatyr. Ázirbaıjan Mámbetov teatry jasandy ıntellekt kómegimen jasalǵan «Jyly muń» spektaklin usyndy.
Halyqaralyq mádenı baılanystar da qarqyndy damyp keledi. 2025 jyly Quralaı Eshmuratovanyń 80 jyldyǵyna arnalǵan «Quralaı» halyqaralyq qýyrshaq teatrlary festıvali ótti.
Qoǵamdaǵy ózekti máseleler de teatr sahnasynan kórinis tabýda. «Zań men tártip» qaǵıdaty aıasynda quqyqtyq mádenıetti qalyptastyrýǵa baǵyttalǵan «Nezavısımye», «S.O.S», «Eki ǵumyr», «Sońǵy aıaldama», «Jyly muń» sııaqty qoıylymdar kórermenge usynyldy. Sondaı-aq Naýryznama onkúndigi men Qajymuqan Muńaıtpasulynyń 155 jyldyǵyna oraı «Qajymuqan» tarıhı dramasynyń premerasy sahnalandy.
Halyqaralyq teatr kúni – teatrdyń qoǵamdaǵy rólin aıqyndaıtyn, ónerdiń adamzat ómirindegi mańyzyn dáripteıtin erekshe mereke. Atalǵan mereke 1961 jyly Halyqaralyq teatr ınstıtýtynyń bastamasymen bekitilgen. Bul kún elorda teatrlary úshin de jańa ıdeıalar men shyǵarmashylyq izdenisterge serpin beretin mańyzdy beles bolyp qala beredi.
Buǵan deıin habarlaǵanymyzdaı, jyl basynan respýblıkalyq teatrlarǵa 170 myńnan asa kórermen bardy.