Astanada halyqaralyq Phygital Contenders Astana 2026 týrnıri bastaldy
ASTANA. KAZINFORM – Elordada halyqaralyq Phygital Contenders Astana 2026 týrnıri bastaldy. Bul jarys – fıdjıtal sporttaǵy eń bedeldi dodalardyń biri sanalatyn «Bolashaq oıyndary – 2026» týrnırine joldama beretin sońǵy irikteý kezeńi. Týrnır aıasynda álemniń túkpir-túkpirinen kelgen komandalar fıdjıtal fýtbol, basketbol jáne bı baǵyttary boıynsha baq synaıdy.
Fıdjıtal sport tsıfrlyq oıyndar men dástúrli sport túrlerin biriktiretin jańa format retinde álemde qarqyndy damyp keledi. Astana 2026 týrnırine qatysý úshin komandalar arnaıy reıtıngtik júıe arqyly birneshe irikteý kezeńinen ótedi.
«Qazsportınvest» AQ sporttyq is-sharalar bóliminiń basshysy Erjan Jakeevtiń aıtýynsha, qazaqstandyq komandalar bul baǵytta qazirdiń ózinde aıtarlyqtaı jetistikterge qol jetkizgen.
– Ótken jyly Abý-Dabıde ótken Games of the Future jarysynda Astananyń kásibı basketbol klýby fıdjıtal basketbol boıynsha álemdik deńgeıde úzdik úshtikke endi. Sondaı-aq qazaqstandyq oıynshylar fıdjıtal shýter baǵytynda eki dúrkin chempıon atandy. Sondyqtan biz bul jarysqa tájirıbeli komandalar retinde qatysyp otyrmyz, - dedi Erjan Jakeev.
Spıkerdiń sózinshe, halyqaralyq ekojúıege búginde 100-ge jýyq memleket qosylǵan. Alaıda Astana 2026 týrnırine olardyń ishinen eń myqty 16 komanda ǵana joldama alady.
Onyń aıtýynsha, komandalar arnaıy reıtıngtik júıe arqyly irikteledi. El ishinde neǵurlym kóp týrnır uıymdastyrylyp, klýbtar joǵary nátıje kórsetken saıyn olardyń halyqaralyq jarystarǵa qatysý múmkindigi artady.
– Álem boıynsha 100-ge jýyq el fıdjıtal sportyna qosylǵan. Alaıda Contenders týrnırine solardyń ishinen úzdik 16 komanda ǵana ótti. Árbir jarys arnaıy talaptarǵa saı uıymdastyrylyp, reıtıngilik upaı beredi. Sonyń nátıjesinde eń myqty klýbtar anyqtalady, - dedi ol.
Týrnır bir mezette Astanadaǵy úsh nysanda ótip jatyr. Fıdjıtal fýtbol jarystary Jaqsylyq Úshkempirov atyndaǵy Jekpe-jek saraıynda uıymdastyrylsa, fıdjıtal basketbol básekeleri «Alaý» muz saraıynda ótedi. Al fıdjıtal bı saıystary Comfort Hotel alańynda bolady.
Sonymen qatar uıymdastyrýshylar jarysta qoldanylatyn barlyq tsıfrlyq oıyn boıynsha lıtsenzııalyq kelisimder tolyq rásimdelgenin málimdedi.
Erjan Jakeevtiń sózinshe, fıdjıtal sporttaǵy árbir dıstsıplına belgili bir oıyn ázirleýshileriniń avtorlyq quqyǵyna táýeldi bolǵandyqtan, halyqaralyq jarystardy ótkizý úshin arnaıy ruqsattar qajet.
– Barlyq segiz fıdjıtal dıstsıplına boıynsha lıtsenzııalar alyndy. Atap aıtqanda, fýtbolda UFL, basketbolda Triple Street, bı baǵytynda Just Dance, shýterde Counter-Strike 2 jáne basqa da oıyndar paıdalanylady. Ár dıstsıplına boıynsha zańdy ókilderimen kelisim jasalǵan, - dedi ol.
Phygital International uıymynyń halyqaralyq marketıng jáne kommýnıkatsııalar jónindegi dırektory Djon Hıýıtt Astana 2026 týrnıriniń mańyzyn atap ótti. Onyń aıtýynsha, Astanaǵa kelgen komandalar bul kezeńge jetý úshin uzaq ári kúrdeli irikteýden ótken.
– Bul jarys – Games of the Future týrnırine aparar sońǵy ári sheshýshi kezeń. Sondyqtan biz qatysýshylarǵa joǵary deńgeıdegi uıymdastyrý men qyzmet kórsetýge erekshe mán berip otyrmyz. Astana mundaı aýqymdy halyqaralyq týrnırdi qabyldaýǵa tolyq daıyn ekenin kórsetip otyr, - dedi Djon Hıýıtt.
Jarysqa qatysý úshin Astanaǵa álemniń ár túkpirinen sportshylar kelgen. Solardyń biri Argentınadan kelgen 22 jastaǵy fýtbolshy Maksım Lo Kore bul formattyń bolashaǵy zor ekenin aıtty.
– Bul meniń – halyqaralyq deńgeıdegi alǵashqy týrnırim. Buǵan deıin óz elimizdegi irikteý kezeńderine qatysqanmyn. Fıdjıtal sporttyń ereksheligi sol, ol dástúrli sport pen tsıfrlyq tehnologııany biriktiredi. Meniń oıymsha, bul – óte qyzyqty ári bolashaǵy zor format. Mundaı jarystar oıynshylardyń jańa deńgeıge kóterilýine múmkindik beredi, - dedi Maksım Lokore.
Phygital Contenders Astana 2026 týrnıri 14 maýsymǵa deıin jalǵasady. Jarys qorytyndysy boıynsha úzdik komandalar shilde-tamyz aılarynda ótetin «Bolashaq oıyndary – 2026» halyqaralyq mýltısporttyq týrnırine joldama alady.
Eske sala keteıik, «Bolashaq oıyndary – 2026» jarysyna qatysý úshin Astanaǵa 800-den astam oıynshy keletinin jazǵan edik.
