Astanada halyqaralyq kloýndar festıvali ótedi
ASTANA. KAZINFORM – Astana qalasynda 1 maýsym – Halyqaralyq balalardy qorǵaý kúnine oraı III Halyqaralyq kloýndar festıvali ótedi.
Elorda ákimdiginiń málimetinshe, festıval balalarǵa merekelik kóńil-kúı syılaýǵa, otbasylyq mádenı demalys dástúrin damytýǵa jáne turǵyndar men qonaqtar úshin ashyq shyǵarmashylyq orta qalyptastyrýǵa baǵyttalǵan.
Festıval aıasynda saǵat 12:00-de Báıterek monýmenti mańynan kloýndar sherýi bastalyp, Ǵashyqtar saıabaǵyna deıin jalǵasady.
Sharaǵa óner áleminde keńinen tanylǵan Mutyrǵanovtar otbasy, elimizdiń ár óńirinen kelgen ónerpazdar, sondaı-aq Danııa, Italııa, Frantsııa, Argentına jáne Reseı elderiniń shyǵarmashylyq ókilderi qatysady.
Saǵat 17:00-de elordalyq Amfıteatr sahnasynda festıval qatysýshylarynyń kontserttik baǵdarlamasy ótedi.
– Kórermenderge balalar men otbasylarǵa arnalǵan shyǵarmashylyq qoıylymdar, sahnalyq kórinister jáne merekelik nómirler usynylady, – dep habarlady ákimdik.
Uıymdastyrýshylardyń aıtýynsha, III Halyqaralyq kloýndar festıvali balalardyń mádenı-shyǵarmashylyq damýyn qoldaýǵa, otbasylyq qundylyqtardy dáripteýge jáne qala turǵyndary men qonaqtary úshin mazmundy mádenı orta qalyptastyrýǵa baǵyttalǵan.
Aıta keteıik, Nıý-Iorktegi Taıms-skver alańynda Dımash Qudaıbergenniń qurmetine merekelik is-shara ótti.
