Astanada Halyqaralyq qytaı tili kúni atalyp ótti
ASTANA. KAZINFORM — Qazaqstan men Qytaı arasyndaǵy mádenı-gýmanıtarlyq yntymaqtastyq aıasynda Astanada Halyqaralyq qytaı tili kúnine arnalǵan saltanatty is-shara ótti.
Іs-shara aıasynda «Jibek joly men kórkem jazý: jastyqty qalammen beıneleý» atty Qazaqstan jasóspirimderiniń qytaı ıeroglıfterin jazý baıqaýynyń jeńimpazdaryn marapattaý rásimi uıymdastyryldy.
Atalǵan is-sharany Qytaı Halyq Respýblıkasynyń Qazaqstan Respýblıkasyndaǵy Elshiligi men Beıjiń til jáne mádenıet ýnıversıtetiniń Qazaqstandaǵy fılıaly birlesip ótkizdi. Baǵdarlama qytaı tilin dáripteý, kallıgrafııa ónerin tanystyrý, mádenı qoıylymdar uıymdastyrý jáne halyqtar arasyndaǵy gýmanıtarlyq baılanysty nyǵaıtýǵa baǵyttaldy.
Saltanatty is-sharaǵa Qytaıdyń Qazaqstandaǵy Tótenshe jáne Ókiletti Elshisi Han Chýnlın, Astana halyqaralyq ýnıversıtetiniń rektory Anar Myrzaǵalıeva, Beıjiń til jáne mádenıet ýnıversıteti Qazaqstan fılıalynyń qytaılyq dırektory Lıý Sıantsıan, Konfýtsıı ınstıtýtynyń ókilderi, bilim berý salasynyń mamandary, stýdentter men qoǵam ókilderi qatysty.
Han Chýnlın óz sózinde Halyqaralyq qytaı tili kúni Birikken Ulttar Uıymy bekitken alty resmı til kúniniń biri ekenin aıtty. Onyń aıtýynsha, Qazaqstanda qytaı tilin oqytý baǵytyndaǵy yntymaqtastyq tabysty damyp kele jatyr.
– Qazirgi tańda Qazaqstanda Qytaı joǵary oqý oryndarynyń 3 fılıaly, 5 Konfýtsıı ınstıtýty jáne 3 Lý Ban sheberhanasy jumys isteıdi. Bul eki el arasyndaǵy bilim berý salasyndaǵy ózara yqpaldastyqtyń naqty nátıjesi, – dedi elshi.
Astana halyqaralyq ýnıversıtetiniń rektory Anar Myrzaǵalıeva qazirgi ýaqytta qytaı tilin meńgerýge degen qyzyǵýshylyq turaqty túrde artyp kele jatqanyn atap ótti. Onyń aıtýynsha, búginde ýnıversıtette qytaı tili mamandyǵy boıynsha bilim alyp jatqan stýdentter sany 450-den asqan.
– Qazaqstan men Qytaı arasyndaǵy ekijaqty yntymaqtastyq aıasynda árbir stýdenttiń jetistigi men ósip-órkendeýi eki eldiń máńgilik jan-jaqty strategııalyq áriptestiginiń jarqyn bolashaǵyn qalyptastyratyn mańyzdy kúsh sanalady, – dep atap ótti rektor.
Mádenı baǵdarlama barysynda ýnıversıtet stýdentteri dombyra kúıin oryndap, bı bılep, qytaı tilinde án shyrqap, qytaı poezııasynan óleń oqydy. Óner kórsetilimderi stýdentterdiń qytaı tilin joǵary deńgeıde meńgergenin aıqyn kórsetti.
Іs-shara aıasynda Qazaqstan jasóspirimderi arasynda ótken qytaı ıeroglıfterin jazý baıqaýynyń jeńimpazdaryn saltanatty marapattaý rásimi ótti. Baıqaý qorytyndysynda qatysýshylar «Kórermen kózaıymy», «Úzdik nátıje», ІІІ oryn, ІІ oryn, І oryn jáne «Úzdik uıymdastyrýshy» atalymdarymen marapattaldy.
Іs-shara sońynda qatysýshylar úshin qytaı kallıgrafııasy boıynsha kórme-tájirıbe alańy uıymdastyrylyp, qonaqtarǵa qytaıdyń dástúrli jazý ónerimen jaqynyraq tanysýǵa múmkindik berildi.
Buǵan deıin 13-17 sáýir aralyǵynda Maqsut Narikbayev University (MNU) bazasynda QR Prezıdenti teleradıokesheni men Qytaı medıa tobynyń (CMG) birlesýimen biregeı bilim berý baǵdarlamasy uıymdastyrǵanyn jazǵan bolatynbyz.