Astanada halyqaralyq gúlder kórmesi ótip jatyr
ASTANA. KAZINFORM – Astanadaǵy EKSPO halyqaralyq kórme ortalyǵynda Flora Expo Astana 2025 atty halyqaralyq gúlder kórmesi ótip jatyr.
Osymen 12 jyl qatarynan ótkizilip jatqan is-sharaǵa bıyl Nıderland, Frantsııa, Shveıtsarııa, Knııa, Ońtústik Koreıa, Japonııa, Belgııa, Italııa, Ózbekstan, Polsha, Ekvador sııaqty 20 elden 200-den astam kompanııa qatysyp otyr.
Uıymdastyrýshylardyń aıtýynsha, byltyrǵy kórme jylyjaı taqyrybyna arnalyp, shara qonaqtarynyń qyzyǵýshylyǵyn týǵyzǵan kórinedi. Sony eskerip bıyl da osy taqyrypty tereńdetý týraly sheshim qabyldapty. Jylyjaıdy avtomattandyrý, klımatty basqarý, jylyjaı ishindegi jaryq pen ylǵaldy tsıfrlyq tásildermen retteý máselelerine arnalǵan tyń sheshimder kórmege qoıylyp otyr.
Aıta ketý kerek, kórmege óz ónimin usynǵan 200-den astam kompanııanyń 40-tan astamy «Qyzǵaldaqtar elinen» kelgen.
8-10 sáýir aralyǵynda ótetin kórmede Nıderland kompanııalarynyń gúl ındýstrııasyndaǵy ınnovatsııalyq tehnologııalary, kógaldandyrý máseleleri, qyzǵaldaq ósirý semınary, jylyjaı bıznesi ókilderiniń forýmy, Qazaqstan florıstıkasynyń áleýeti taqyryptaryna arnalǵan 25 is-shara uıymdastyrylady.
Kórme aıasynda álemniń gúl eksporty naryǵynda jetekshi sanalatyn kompanııalar sheberlik saǵattaryn ótkizedi. Kórme 8,9 sáýir kúnderi 9.00-18.00 aralyǵynda, 10 sáýir kúni 9.30-15.30 aralyǵynda ótedi.
Byltyr Qazaqstan 93,5 mln dollarǵa 12,3 myń tonna gúl ımporttaǵan.
