Astanada halyqaralyq frantsýz mektebiniń irgetasy qalandy
ASTANA. KAZINFORM – Astanada Qazaqstan men Frantsııanyń bilim berý salasyndaǵy birlesken jobasy – Halyqaralyq frantsýz mektebiniń qurylysy saltanatty túrde bastaldy. Bolashaq lıtseı jobasynyń tusaýkeseri ótip, mektep kireberisindegi eskertkish taqta ashyldy.
Bul joba Qazaqstan Prezıdenti Qasym-Jomart Toqaev pen Frantsııa Prezıdenti Emmanýel Makron arasyndaǵy kelisimder aıasynda júzege asyrylyp jatyr. Pansıony bar bul mektep frantsýz jáne qazaqstandyq bilim berý standarttaryna saı jumys istemek.
Saltanatty is-sharaǵa Frantsııanyń Syrtqy saýda jáne sheteldegi frantsýzdar jónindegi ýákiletti mınıstri Loran Sen-Marten arnaıy qatysty.
− Astanadaǵy frantsýz mektebi, sondaı-aq jaqyn arada esigin ashatyn Almatydaǵy mektep jas qazaqstandyqtarǵa frantsýz, qazaq, aǵylshyn jáne orys tilderinde bilim alýǵa múmkindik beredi. Frantsýz úlgisindegi attestat alǵan túlekter Frantsııa men Eýropanyń úzdik ýnıversıtetterine tikeleı túse alady. Frantsýz halyqaralyq bilim berý jelisi – óte baı ári óte tyǵyz qurylym, álemniń kóptegen elderinde júzdegen oqý ornyn qamtıdy. Astanada da osyndaı tamasha oqý ornyn ashý – bizdiń dıplomatııalyq baılanystarymyzdy nyǵaıtý úshin mańyzdy qadam ekeni anyq, − dedi Loran Sen-Marten.
Jospar boıynsha, Ortalyq Azııadaǵy halyqaralyq deńgeıdegi jetekshi bilim ordasynyń biri bolýǵa úmitti bul mektep 2026 jyly 1 qyrkúıekte alǵashqy oqýshylaryn qabyldaıdy.
− Astanadaǵy Halyqaralyq frantsýz mektebiniń alǵashqy kirpishiniń qalaný rásimi sózsiz, bilim salasyndaǵy aıtýly oqıǵaǵa aınalmaq. Bul jaı ǵana jańa mektep salý emes – Qazaqstan men Frantsııanyń bilim salasyndaǵy yntymaqtastyǵynyń tereńdeı túskeniniń belgisi. Bul mektep arhıtektýralyq jáne bilim berý jaǵynan úlgi bolyp, elderimiz arasyndaǵy shynaıy kópirge aınalaryna senimdimiz, − dedi Qazaqstan Respýblıkasynyń Oqý-aǵartý mınıstri Ǵanı Beısembaev.
Aıta keteıik, Astanada Qazaqstan men Frantsııa arasyndaǵy iskerlik baılanystardy damytýǵa arnalǵan Qazaqstan-Frantsııa bıznes-forýmy ótti. Qazaqstanda frantsýz ınvestıtsııasy bar 170 kompanııa jumys isteıdi.