Astanada halyqaralyq beınematerıaldar baıqaýy máresine jetti

ASTANA. KAZINFORM – Astanada «Birikken ult jeńedi» atty V halyqaralyq beınematerıaldar baıqaýynyń jeńimpazdary marapattaldy.

«Uly Jeńisti ulyqtaǵan, rýhy bıik jas urpaq!» taqyrybymen jarııalanǵan shyǵarmashylyq dodaǵa Qazaqstan oqý oryndarynan basqa AQSh, Ulybrıtanııa, Japonııa, Ońtústik Koreıa, Túrkııa, Reseı jáne Ortalyq Azııa elderiniń 100-den astam ýnıversıtetinen beınematerıaldar kelip túsken. Bilim alýshy jastardyń jumystary tek tarıhı taqyryppen shektelip qoımaı, ulttyń jady, beıbitshilik pen bolashaq urpaqtyń rýhanı damýy jónindegi zamanaýı kózqarastarmen erekshelendi.

Baıqaýdyń negizin qalaýshy — professor, kásibı telejýrnalıst, «Daryn» memlekettik syılyǵynyń ıegeri Ulbosyn Esenbekova. 2020 jyly pandemııa kezinde professor óziniń osy jobasyn usynǵan sátten bastap, baıqaý jyl saıyn ózektiligin arttyryp, jastar úshin shyǵarmashylyq erkindik pen patrıottyq rýhty toǵystyrǵan mańyzdy platformaǵa aınalǵan.

— Jasandy ıntellekt pen alapat tsıfrlyq daýyldar dáýirinde qazaq medıasyn álemge tanytý — basty mıssııamyz boldy. Bul baıqaý — oıy júırik, sózi ótkir, jańa zaman jýrnalısterin tárbıeleý alańy, — dedi Ulbosyn Esenbekova.

Baıqaýǵa qatysýshylarǵa Parlament Májilisiniń depýtattary, aqyn Qazybek Isa men Janarbek Áshimjan júrekjardy lebizderin arnady.

Qazybek Isa bul jobany «ulttyq ıdeologııany jańǵyrtatyn mańyzdy bastama» dep baǵalasa, Janarbek Áshimjan «baıqaý ataýy — poetıkalyq tirkes qana emes, ult bolashaǵyna senim uıalatatyn uran» ekenin atap ótti.

Baıqaýdyń eń joǵarǵy marapaty — Gran-Prı L. N. Gýmılev atyndaǵy EUÝ stýdenti Farıza Baýyrjanqyzyna tabystaldy.

Aıta ketelik jýrnalıster beıbit mıtıng kezinde qalaı jumys isteýi kerektigi týraly jazǵan edik.