Astanada Halyqaralyq balalardy qorǵaý kúnine oraı 100-ge jýyq is-shara ótedi
ASTANA. KAZINFORM – Merekelik baǵdarlama balalardy qoldaýǵa, otbasylyq qundylyqtardy nyǵaıtýǵa, ınklıýzıvti ortany damytýǵa, qaýipsiz ári mazmundy jazǵy demalysty uıymdastyrýǵa baǵyttalyp otyr. Bul týraly Astana qalasy kommýnıkatsııalar qyzmetiniń alańynda ótken baspasóz májilisinde qalalyq Balalardyń quqyqtaryn qorǵaý basqarmasynyń basshysy Serik Ádilbaı aıtty.
Onyń sózinshe, is-sharalar baǵdarlamasy balalardyń jas erekshelikteri men otbasylardyń qyzyǵýshylyqtaryn eskere otyryp, taqyryptyq blokqa bólingen.
«Besik álemi»: elordanyń eń kishkentaı turǵyndaryna arnalǵan
– «Besik álemi» atty alǵashqy taqyryptyq blok 0-den 3 jasqa deıingi búldirshinderdi qamtıdy. Solardyń biri – 1 maýsym kúni Otan qorǵaýshylar saıabaǵynda jas otbasylardyń qatysýymen ótetin «Arba Fest» arbalar sherýi». Sonymen birge sol kúni Prezıdent saıabaǵynda eńbektep júretin sábıler arasynda «Shapshań bóbek» sporttyq jarysy ótedi,-dedi basqarma basshysy.
Sondaı-aq ol 26 mamyrda alǵashqy medıtsınalyq-sanıtarlyq kómek uıymdarynda «Balaǵa qamqorlyq - ultqa qamqorlyq» atty Ashyq esik kúni uıymdastyrylatynyn atap ótti. Onda sábıler profılaktıkalyq tekserýden ótip, dárigerler keńes beretin bolady.
«Balapan álemi»: 3 jastan 6 jasqa deıingi balalar úshin
– Elordada mektepke deıingi jastaǵy balalar úshin «Balapan álemi» taqyryptyq blogy uıymdastyrylady. Onyń aıasynda oıyn-saýyq, shyǵarmashylyq jáne bilim berý baǵytyndaǵy is-sharalar ótedi. 1 maýsym kúni Qýyrshaq teatry kishkentaı kórermenderine «Kúlsheqyzdyń shyny shárkeıi» spektaklin usynady, al Esil ózeniniń jaǵalaýynda Amfıteatrda otandyq jáne sheteldik ártisterdiń qatysýymen Halyqaralyq kloýndar festıvali ótedi,-dedi spıker.
Sonymen qosa qalanyń balabaqshalarynda «Biz baqytty baldyrǵan» chellendji, «ART-FEST: Balalyq shaq boıaýlary» Open Air festıvali, «Super Mama & Super Papa» otbasylyq sporttyq oıyndary jáne búldirshinderge arnalǵan «Qaýipsizdik sabaqtary» atty bilim berý trenıngteri uıymdastyrylatynyn jetkizdi. Sondaı-aq balalardy taza aýadaǵy ınteraktıvti oıyndar men asfaltqa sýret salý sharalary kútedi. Qalalyq emhanalarda balalardy profılaktıkalyq stomatologııalyq tekserýden ótkizý boıynsha Ashyq esik kúni ótetinin de eske saldy.
«Bilim men arman álemi»: oqýshylarǵa arnalǵan tanymdyq demalys
– Oqýshylar úshin teatrlarǵa, tsırkke, murajaılarǵa barý, elordanyń kórikti jerlerine ekskýrsııalar jáne kınoteatrlarǵa saıahattar uıymdastyrylady,-dedi Serik Táýkeuly.
Eske salaıyq, 1 maýsymnan bastap qala boıynsha mektep janyndaǵy lagerler óz jumysyn bastaıdy. Onda balalar jazǵy demalysyn qyzyqty ári paıdaly ótkize alady. Spıkerdiń sózinshe, qalalyq alańda balalar mýzykalyq mektepteriniń qatysýymen «Balalyq shaq» kontserttik baǵdarlamasy ótedi.
«Jas órken»: jasóspirimderge arnalǵan
– 11-14 jas aralyǵyndaǵy jasóspirimder úshin belsendi, tanymdyq jáne qaýipsiz demalysty damytýǵa baǵyttalǵan «JAS ÓRKEN» taqyryptyq blogy daıyndaldy. Baǵdarlama aıasynda 29 mamyr kúni «Jasyl el» jazǵy eńbek maýsymynyń saltanatty ashylýy jáne M. Ótemisov atyndaǵy Oqýshylar saraıy alańynda «Bala energy» Open-air festıvali ótedi»,-dedi basqarma basshysy.
Budan basqa «Meıirimdilik shýaǵy» áleýmettik-ınklıýzıvti aktsııasy, «Ethno Games ArqaLan» ulttyq oıyndar festıvali jáne «Halyq doby» jappaı sporttyq jarystary uıymdastyrylatynyn tilge tıek etti.
«Bolashaqqa qadam»: tehnologııa, kóshbasshylyq jáne jańa múmkindikter
Spıkerdiń sózinshe, «Bolashaqqa qadam» atty besinshi taqyryptyq blok 15-17 jas aralyǵyndaǵy jasóspirimderge arnalǵan.
– Astanada ınjenerııaǵa, ınnovatsııaǵa jáne robototehnıkaǵa qyzyǵatyn oqýshylardyń basyn qosatyn «Astana FIDA Drone Soccer Championship» halyqaralyq dron-fýtbol chempıonaty ótedi. 1 maýsym kúni «QosymshaFest» festıvali uıymdastyrylady. Stýdentterge kıberqaýipsizdik boıynsha sheberlik sabaqtary ótedi. Sonymen qatar depýtattarmen, memlekettik organdar basshylarymen jáne qoǵam qaıratkerlerimen «Bala úni» atty kezdesý uıymdastyrylady»,-dedi ol.
«Baqytty otbasy»: otbasylyq festıvalder men abattandyrylǵan aýlalar
Basqarma basshysynyń aıtýynsha, mereke kúnderi elordanyń alańdarynda, saıabaqtarynda otbasylyq is-sharalar ótedi. Qala turǵyndary men qonaqtary úshin «Ekomamafest 2026», «BópeFair» jáne «Bala Fest» festıvalderi uıymdastyrylady. 1 maýsym kúni «Mereke» saıabaǵynda jas otbasylarǵa arnalǵan «Otbasy - baqyt mekeni» sýret salý kýrsy ótedi.
– Sonymen qatar Balalardy qorǵaý kúnine oraı elordada kúrdeli jóndeýden keıingi aýla aýmaqtarynyń saltanatty ashylýy josparlanǵan. Jańartylǵan aýlalarda zamanaýı balalar oıyn keshenderi, sporttyq jáne jattyǵý alańdary ornatylady,-dep atap ótti spıker.
Budan bólek spıkerdiń sózinshe, merekelik baǵdarlama aıasynda balalardyń qaýipsizdigi men kámeletke tolmaǵandar arasyndaǵy quqyq buzýshylyqtyń aldyn alý máselelerine basa nazar aýdarylyp otyr. Elordanyń barlyq aýdanynda balalar úshin qaýipsiz orta qalyptastyrýǵa jáne quqyqtyq saýattylyqty arttyrýǵa baǵyttalǵan aktsııalar men is-sharalar, onyń ishinde «Qaýipsiz aýla» aktsııasy men «Jasóspirim» jedel-profılaktıkalyq is-sharasy ótedi.
Buǵan deıin portalymyzda balalar lagerlerine biryńǵaı talap engizilgeni jaıly jazdyq.
