Astanada halyqaralyq at sporty týrnıriniń fınaly ótip jatyr

Shabandozdar konkýr (alańdaǵy ártúrli kedergilerden at qarǵytý) men jorǵa saıysy boıynsha synǵa túsedi. Týrnırdiń sońǵy kezeńinde qatysýshylar bıiktigi 160 santımetr kedergiden ótýi tıis.

Jarys aldynda sportshylar jerebe sýyryp, jergilikti tulparlardyń birin tańdaıdy. Shabandozdar óz jylqysymen emes, buryn múlde minbegen tulparmen óner kórsetýge tıis. 
Qazaqstannyń at sporty federatsııasynyń prezıdenti Rýstam Baıalıev jarystyń el sporty úshin máni zor ekenin atap ótti.

– Qazaqstan tarıhynda alǵash ret bir alańda birden úsh halyqaralyq týrnır ótip jatyr. Bul – otandyq at sportynyń damýyna serpin beretin, elimizdiń álemdik sport salasyndaǵy bedelin nyǵaıtatyn mańyzdy qadam. Astana álemniń túkpir-túkpirinen kelgen shabandozdardy, halyqaralyq sarapshylardy jáne at sporty qaýymdastyǵyn toǵystyratyn mańyzdy ortalyqqa aınalyp otyr, - dedi ol.

Qazaqstan quramasynyń atynan saıysqa 11 sportshy qatysyp jatyr. At sportynan QR qurama komandasynyń bas bapkeri Áset Tolqynbekovtiń aıtýynsha, jarys otandyq shabandozdardyń tájirıbesin arttyryp qana qoımaı, ulttyq komandanyń halyqaralyq reıtıngide joǵarylaýyna múmkindik beredi. 

– Búgingi doda – Eýrazııa lıgasynyń alǵashqy kezeńderdiń biri. Buǵan deıin týrnır Ózbekstanda jáne Qyrǵyzstanda ótti. Tórtinshi kezeń Astanada uıymdastyrylyp otyr. Qazir Qazaqstan sportshysy Oleg Sokolenko jalpy esepte birinshi orynda tur. Bizdiń sportshylar joǵary deńgeıde óner kórsetedi dep senemiz. Barlyq qatysýshynyń daıyndyǵy myqty, attardyń da baby jaqsy, - dedi bapker.

Týrnırge kelgen sheteldik qonaqtar uıymdastyrý deńgeıine oń baǵa berdi. Eýrazııalyq at sporty qaýymdastyǵynyń basshysy Marına Sechına jarystyń deńgeıi joǵary ekenin atap ótti. 

– Biz búgin tarıhı sáttiń kýási bolyp otyrmyz. Astanada bir ýaqytta konkýr, joǵary deńgeıdegi úsh juldyzdy báıge jáne jas sportshylarǵa arnalǵan chellendj ótip jatyr. 

Uıymdastyrýshylar tynymsyz eńbek etip, sportshylarǵa qolaıly jaǵdaı jasaǵany kórinip tur. Eń bastysy – sportshylar bir-birimen tanysyp, tájirıbe almasa alady. Bul tek jarys emes, halyqaralyq sportshylardyń basyn qosatyn alań, - dedi Marııa Sechına.

Álemniń túkpir-túkpirinen jınalǵan shabandozdar attarynyń aıylyn qaıta tekserip álek boldy. Kolýmbııadan kelgen qatysýshylardyń biri Emılıana Londono qaladan áser alǵanyn jasyrmady.

– Qazaqstanǵa alǵash ret kelip turmyn. Astana da, týrnırdiń uıymdastyrý deńgeıi de kóńilimnen shyqty. Búgin bar kúshimdi salyp, jeńiske jetýge tyrysamyn, - dedi jas sportshy.

Úndistannan kelgen Djeffrı Kendall týrnır deńgeıine toqtaldy. 

– Saıysqa ulym Nıldy alyp keldim. Bul – Qazaqstandaǵy alǵashqy jarysymyz. Ulym byltyr FEI World Challenge irikteýinde álem boıynsha besinshi oryn alǵan edi. Uıymdastyrýshylardyń jumysyn joǵary baǵalaımyn, qatysýshylar men qonaqtarǵa qolaıly jaǵdaı jasalǵan, - dedi ol.

Jarys keshe bastalǵan, 31 mamyrǵa deıin jalǵasady. Oǵan Brazılııa, Kolýmbııa, Úndistan, Marokko, Jańa Zelandııa, Ońtústik Afrıka, Mysyr, Ekvador, Reseı, Ózbekstan, Qazaqstan jáne ózge de elderden kelgen sportshylar qatysyp jatyr. Dodada top jarǵan shabandozdar Germanııanyń Aahen qalasynda ótetin FEI 2026 álem chempıonatyna joldama alady. 

Aıta keteıik, buǵan deıin Tashkent qalasynda ótken Fédération Équestre Internationale (FEI) bekitken halyqaralyq at sporty týrnırinde Qazaqstan quramasy júlde alǵanyn jazǵan edik.

Darııa Ǵumar