Astanada Halyqaralyq Araldy qutqarý qory basqarmasynyń birinshi otyrysy ótti
ASTANA. KAZINFORM – Premer-Mınıstrdiń orynbasary Qanat Bozymbaevtyń tóraǵalyǵymen ótken is-sharaǵa Qazaqstannyń sý resýrstary jáne ırrıgatsııa mınıstri Nurjan Nurjigitov, HAQQ atqarý komıtetiniń tóraǵasy Ashat Oralbaı, Tájikstan Premer-Mınıstriniń orynbasary Sýlaımon Zıezoda, Túrikmenstan Mınıstrler kabıneti tóraǵasynyń orynbasary Tangrykýlı Atahallyev, Ózbekstan Respýblıkasy Prezıdentiniń keńesshisi Shýhrat Ganıev, Qyrǵyzstan Respýblıkasynyń Qazaqstandaǵy Tótenshe jáne Ókiletti Elshisi Dastan Dıýshekeev qatysty.
Halyqaralyq Araldy qutqarý qory (HAQQ) – 1993 jyly qurylǵan jáne Ortalyq Azııadaǵy negizgi aımaqtyq organdardyń biri. Qazaqstan 2026 jylǵa deıin HAQQ tóraǵalyǵyn qabyldady jáne búgin Qor basqarmasynyń birinshi otyrysyn ótkizdi.
«HAQQ Ortalyq Azııanyń áleýmettik-ekonomıkalyq ál-aýqatyna yqpal ete alatyn óńirlik yntymaqtastyqtyń qýatty ujymdyq quralyna aınaldy. HAQQ sheńberindegi tyǵyz ózara is-qımyldyń jáne memleketter basshylarynyń saıası erik-jigeriniń arqasynda Qor Aral daǵdarysyna baılanysty keń aýqymdy máselelerdi sheshýge bizdiń elderimiz kúsh-jigerin biriktire aldy. Basqarmanyń qazirgi otyrysy elderimizdiń kúsh-jigerine qosymsha serpin beretinine senimdimin. Aral teńizi basseınindegi sý-energetıkalyq resýrstardy ózara tıimdi paıdalanýdyń uzaqmerzimdi tetigi qajet. Sondaı-aq Syrdarııa jáne Amýdarııa ózenderi basseınderindegi energetıkalyq jáne ırrıgatsııalyq múddelerdi eskere otyryp, sý qoımalarynyń jumys rejımderi boıynsha kelisilgen is-qımyldardy qamtamasyz etý qajet. Sý men energetıka qyzmetkerleriniń tikeleı ózara árekettesýi klımattyq jaǵdaılarda, ıaǵnı, sý tasqyny men qurǵaqshylyq kezinde kelisilgen sheshimder qabyldaýǵa múmkindik beredi», - dep atap ótti vıtse-premer Qanat Bozymbaev óz sózinde.
Jıyn barysynda Qazaqstan tarapy Jumys josparyn usyndy. Qujat quryltaıshy memleketterdiń basshylary men HAQQ Prezıdentiniń tapsyrmalaryn iske asyrýǵa, Qordyń uıymdyq qurylymy men sharttyq-quqyqtyq bazasyn jetildirýge arnalǵan 10 baǵyt pen 40-tan astam is-sharadan turady.
Eki aýqymdy jobany: aıasynda óńirde 35 joba iske asyrylyp jatqan Aral teńizi basseıni elderine kómek kórsetý jónindegi is-qımyl baǵdarlamasy jáne Ortalyq Azııada ornyqty damý úshin qorshaǵan ortany qorǵaý jónindegi óńirlik baǵdarlamany odan ári júzege asyrý da basym baǵyt sanalady.
