Astanada halyq tyǵyz qonystanǵan aýdandardyń birinde keleshek mektebi ashyldy
ASTANA. KAZINFORM — Elordadaǵy eń iri turǵyn alaptardyń biri — Úrker eldi mekeninde búginde shamamen 35 myńǵa jýyq adam turady. Mundaǵy jalǵyz mektep uzaq ýaqyt boıy úsh aýysymda jumys istep kelgen, dep habarlaıdy Astana qalasy ákimdiginiń resmı saıty.
Jýyrda ashylǵan jańa ári jaıly № 33 mektep osy máseleni sheshýge múmkindik berdi. Endi turǵyn alaptaǵy balalar qala ortalyǵyna qatynamaı-aq, óz mektebinde bilim alatyn boldy.
«Keleshek mektebi» № 33 Memleket basshysy bastaǵan aýqymdy baǵdarlama aıasynda boı kóterdi.
— Bul mektep ashylǵanǵa deıin Úrkerde bir ǵana úsh aýysymdy mektep-gımnazııa boldy. Jańa mekteptiń iske qosylýynyń arqasynda úsh aýysym máselesi tolyq sheshildi. Qazirgi tańda munda shamamen 3 myń bala oqıdy. Olardyń basym bóligi burynǵy mektepten aýysty, sondaı-aq qalada bilim alyp júrgen, biraq oryn jetispegendikten mektepke qabyldanbaǵan balalar da qaıta oraldy. Olar jazǵy ýaqytta ornalasyp úlgerdi, — dedi mektep dırektory Dana Orazalına.
Aıta keteıik, Dana Orazalına — zamanaýı menedjment qaǵıdattaryn engizip, jańa úlgidegi bilim berý uıymdarynyń basshylaryn daıarlaýǵa baǵyttalǵan «Bilim berýdegi ózgeristerdiń 1000 kóshbasshysy» baǵdarlamasynyń túlegi.
Jańa mektep ashylǵan soń dırektor eń aldymen balalar men ata-analardyń suranysy boıynsha STEM-akademııasy men robototehnıka úıirmesin iske qosty. Qazirgi tańda mektepte 10-nan astam shyǵarmashylyq jáne sporttyq úıirme jumys isteıdi.
— Mektep 2000 orynǵa eseptelgen, qazirgi ýaqytta 1600 bala bilim alady. Olar bir aýysymda oqıdy. Sonyń arqasynda balalar túrli sektsııalarǵa qatysa alady. Búgingi kúni eki baǵyt boıynsha úıirmeler bar: shyǵarmashylyq jáne sporttyq. Shyǵarmashylyq baǵytta — dombyra ansambli, qysh óneri, qoldanbaly óner men telestýdııa, sportta — fýtbol, voleıbol, basketbol, qazaq kúresi men shahmat sektsııalary jumys isteıdi, — dedi mektep basshysy.
Oqý ornynda eki keń sport zaly, tórt kıim aýystyratyn bólme men dýsh kabınalary bar. Fýtbol alańy, ústel tennısine arnalǵan oryn da qarastyrylǵan. Sondaı-aq, munda kitap oqý zaly, telestýdııa, jasandy ıntellekt negizinde jumys isteıtin arnaıy kabınetter jabdyqtalǵan.
— Balalar sabaqtan keıin asyǵyp úılerine qaıtpaıdy. Olar úıirmelerge qatysyp, bir-birimen aralasyp, bilim men oı bólisip, dostasady. Erekshe bir sát — ata-analar jınalysyna barlyq ata-ana tolyq qatysty. Buryn-sońdy tájirıbemde mundaı bolǵan emes. Ádette bárin jınaý qıynǵa soǵady, al bul joly túgel jınaldy! Mekteptiń ashylýyn da turǵyndar taǵatsyzdana kútti, qýanyshpen qarsy aldy, — dedi mektep muǵalimi.
Mektepte oqýshylar men ustazdardyń qaýipsizdigine erekshe nazar aýdarylǵan. Bilim ordasy úsh bólek bloktan turady: bastaýysh, orta jáne joǵary synyptarǵa arnalǵan. Bıylǵy oqý jylynda munda 23 bastaýysh synyp jumys istep tur, onyń ishinde 10-y — birinshi synyp. Sondaı-aq, ınklıýzııaǵa arnalǵan bólek bólim bar.
— Qazirgi tańda erekshe bilim berýdi qajet etetin balalardyń sany artyp keledi. Bizde mundaı balalardy bilim berý protsesine tolyqtaı engizýge múmkindik bar. Qazir ınklıýzııa boıynsha 12 bala oqyp júr. Ár balaǵa arnaıy pedagog-assıstent bekitilgen, eki bala úıden oqıdy. Sonymen qatar logoped, psıholog, defektolog mamandar bar, olar kez kelgen ýaqytta kómekke kele alady, — dep tolyqtyrdy dırektor.
Eske sala keteıik, 2024 jyly Astanada 16 «Keleshek mektebi», al bıyl taǵy jeti mektep ashyldy.
Buǵan deıin 2028 jylǵa deıin mektepterde 1000 stomatologııalyq kabınet ashylatyny habarlandy.