Astanada halyq sany 1,6 mıllıon adamnan asty – Infraqurylym daıyn ba
ASTANA. KAZINFORM – Qarasha aıynda elordadaǵy halyq sany 1,6 mıllıon adamnan asqan. Halyqtyń jyl saıynǵy ósimi qalaǵa júktemeni arttyryp, úlken jaýapkershilikti júkteıdi. Bul týraly Astana qalasynyń ákimi Jeńis Qasymbek eseptik kezdesýinde aıtty.
Ákimniń aıtýynsha, orta eseppen halyq sany jyl saıyn shamamen 7 paıyzǵa nemese 100 myń adamǵa artady.
– Maıatnıktik mıgratsııa esebinen elordaǵa kúnine 200 myńnan astam adam keledi. Sondaı-aq 100 myńǵa jýyq tirkelmegen azamat bar. Turǵyndar sanynyń artýy ınfraqurylymnyń aldyn ala damýyn talap etedi. Ózderińiz biletindeı eki jyl buryn qala sý men jylý qýatynyń jetispeýshiligine tap boldy. №3 sorǵy-súzgi stantsııasy men Astana sý qoımasynan ekinshi sý qubyry jelisin aıaqtaý arqyly qosymsha táýligine 60 myń tekshe metr aýyz sý qamtamasyz etildi. Jalpy alǵanda, qalanyń sý tutyný kólemi táýligine 350 myń tekshe metrdi quraıdy, - dedi J. Qasymbek Ortalyq kommýnıkatsııalar qyzmetinde.
Bıyl tórtinshi sorǵy-súzgi stantsııasynyń qurylysy bastaldy, ol qalany aldaǵy ondaǵan jyl boıy turaqty sýmen jabdyqtaýdy qamtamasyz etedi.
– Birinshi káriz-tazartý stantsııasynyń qýaty artýda, ekinshi stantsııasynyń qurylysy bastaldy. Indýstrıaldy park, Kóktal jáne Óndiris turǵyn alaptarynda jergilikti káriz-tazartý qurylǵylary jobalaryn júzege asyryp jatyrmyz. Bul jobalardy 2027-2029 jyldar aralyǵynda aıaqtap, sý burý máselelerin tolyqtaı sheshemiz, - dedi elorda ákimi.
Sonymen birge, jańa jylý kózderin engizý jylý júıesiniń qýatyn 34 paıyzǵa arttyrdy. Qazirgi jylytý maýsymy shtattyq rejımde ótip jatyr. Mysaly, búgin mınýs 20 S temperatýrasynda jylý profıtsıti saǵatyna 1500 Gkal quraıdy.
– Jylý qýattaryn saqtap qalý úshin jańa «Telman» gaz jylytý stantsııasynyń qurylysy júrip jatyr. Ekinshi jylý elektr ortalyǵyn keńeıtýge daıyndyq jáne úshinshi jylý ortalyǵynyń kelesi kezegin josparlaý bastaldy. Prezıdent tapsyrmasyna sáıkes, elordany gazdandyrý aıaqtalýda. Qalanyń 95 paıyzy qamtylyp, gaz 14 turǵyn alapqa jetkizildi. Kelesi jyly 100 paıyzǵa jetemiz, - dedi Jeńis Qasymbek.
Buǵan deıin elordanyń qysqy maýsymǵa qalaı daıyndalǵanyn habarlaǵan edik.