Astanada ǵylym, mádenıet jáne óner salasyndaǵy úzdikter marapattaldy
Іs-sharada Qazaqstannyń jaratylystaný, gýmanıtarlyq, tehnıkalyq ǵylymdaryn damytýǵa eleýli úles qosyp júrgen ǵalymdarmen qatar, mýzykanttar jáne ártister saltanatty jaǵdaıda marapattaldy.
Tuńǵysh Prezıdent Qory biregeı zertteýler men úzdik joba avtorlaryn anyqtaýdy dástúrge aınaldyrǵan. Jas ǵalymdar men shyǵarmashyl jastardy qoldaý maqsatynda 2008 jyldan beri baıqaý uıymdastyrylyp, laýreattar tańdalady. Konkýrs mýzyka, teatr jáne sýret óneriniń, kınematografııa, kórkem ádebıet, jýrnalıstıka, fızıka, matematıka, ınjenerlik, qoǵamdyq jáne gýmanıtarlyq baǵyttar boıynsha ótkiziledi. Osy kúnge deıin 240 maman laýreat atanǵan. Búgin taǵy 18 talapshyl jas osy tizimdi tolyqtyrdy. Nátıjesinde atalǵan konkýrs boıynsha Tuńǵysh Prezıdent Qorynda 258 laýreat bar.
Búgingi marapattaý sharasyna QR Parlamenti Senatynyń depýtaty, Parlament Senaty Halyqaralyq qatynastar, qorǵanys pen qaýipsizdik komıtetiniń tóraǵasy, Qazaqstan Respýblıkasynyń Tuńǵysh Prezıdenti - Elbasy Qorynyń dırektory Darıǵa Nazarbaeva, shet elderdiń Qazaqstandaǵy tótenshe jáne ókiletti elshileri, QR Parlamentiniń depýtattary, qoǵam qaıratkerleri, ǵylym men mádenıet qyzmetkerleri, ÚEU ókilderi qatysty.
Syılyq taǵaıyndaý saltanatty sharasyn ashý barysynda QR Tuńǵysh Prezıdenti - Elbasy Qorynyń dırektory Darıǵa Nazarbaeva jınalǵan qaýymdy kele jatqan Alǵys aıtý kúnimen quttyqtap, laýreattarǵa alǵys aıtty.
«Belsendilik tanytqan konkýrs qatysýshylaryna alǵys aıtamyn. Sizder zııatkerlik, shyǵarmashylyq jumysyńyzben rýhanı qundylyqtardyń nyǵaıýyna, ulttyq mádenıettiń damýyna atsalysyp, halyqaralyq arenada Qazaqstan ımıdjin kóterip, el abyroıyn asqaqtatyp júrsizder. Sizderge kóp rahmet!», - dedi ol.
Laýreattarǵa dıplom, tósbelgi jáne aqshalaı syılyq berildi.
Aıta ketý kerek, Tuńǵysh Prezıdent Qorynyń laýreattary qatarynda Dımash Qudaıbergen, Ásel Saǵatova, Álisher Kárimov jáne basqa da tanymal tulǵalar bar.
Ǵylym salasyndaǵy syılyq ıegerleri:
- Nurhat Jaqıev - Nazarbaev ýnıversıtetiniń ǵylymı qyzmetkeri, PhD doktor. Syılyq jylý elektr stansalarynyń qýat tıimdiligin 15% joǵarlatatyn biregeı kópfaktorly matematıkalyq modeliniń jumysyn ońtaılandyrý zertteýi úshin taǵaıyndaldy.
- Almıra Jylqashınova - S. Amanjolov at. Shyǵys Qazaqstan memlekettik ýnıversıtetiniń aǵa ǵylymı qyzmetkeri, fızıka-matematıkalyq ǵylymdarynyń kandıdaty. Syılyq derıvatsııalyq túrdegi biregeı otandyq ushqyshsyz kishi gıdroelektrostansasyn oılap tapqany úshin berildi;
- Araıly Zákıeva - Semeı q. Shákárim at. Memlekettik ýnıversıtetiniń Agrarlyq fakýlteti dekanynyń orynbasary, PhD doktor. Syılyq klımat pen topyraqqa beıimdeletin mol ónim beretin otandyq burshaqty daqyldar oılap tapqany úshin taǵaıyndaldy;
- Dınara Sarybaeva - Qazaq ulttyq agrarlyq ýnıversıtetiniń aǵa oqytýshysy, PhD doktor. Premııa ishek-qaryn aýrýlaryn aldyn alýǵa jáne emdeýge arnalǵan sheteldik preparatty aýystyratyn «Antakon» dárisin daıyndaǵany úshin berildi;
- Haıdar Tasybekov - ál-Farabı at. QazMÝ bas ǵylymı qyzmetkeri, hımııa ǵylymdarynyń doktory. Syılyq Qazaqstannyń polımetall kenderinen renıı, molıbden jáne volfram alý úshin joǵary tıimdi ımporttyq kómirtekti sorbentti aýystyratyn zerttemesi úshin;
- Manap Jantasov - M. Áýezov at. OQMÝ dotsenti, tehnıkalyq ǵylymdardyń kandıdaty. Premııa magıstraldy munaı qubyrlaryn dattan qorǵaý úshin jasalǵan zerttemesi úshin;
- Ellına Mýn - RQ BǴM ǴK bıotehnologııa Ulttyq ortalyǵynyń jetekshi ǵylymı qyzmetkeri, PhD doktor. Premııa onkologııalyq dertterdiń terapııasynda qoldanylatyn dári-dármekterdi otandyq biregeı nanojúıelik vezıkýlıarlyq túrde jetkizýge arnalǵan zerttemesi úshin;
- Nurbek Nádirov - Ana men bala Ulttyq ǵylymı ortalyǵy «UMC» KQ travmatolog-dárigeri, ortoped, PhD doktor. Premııa balalardyń omyrtqasynyń deformatsııasyn jóndeýge arnalǵan metodıkany oılap tapqany úshin berildi.
Mádenıet pen óner salasyndaǵy úzdikter tizimi:
Baýyrjan Aqtaev - «Astana sazy» etno-folklorlyq ansambliniń kórkemdik jetekshisi. Batys Qazaqstan oblysynda ulttyq mýzyka óneriniń damýyna qosqan úlesi úshin marapattaldy;
- Dına Mırmanova - «Astana Musical» memlekettik teatrynyń akkompanıator-kontsertmeısteri. Eldiń qoǵamdyq jáne mádenı ómirine qosqan úlesi úshin, joǵary kásibı sheberligi úshin jáne joǵary shyǵarmashylyq belsendiligi úshin marapattaldy;
- Arman Júdebaev - Kurmanǵazy at. Qazaq ulttyq konservatorııasynyń rektory, «Dırıjerlik» kafedrasynyń aǵa oqytýshysy. QR mýzyka óneriniń damýyna qosqan úlesi úshin marapattaldy;
- Aızada Kaponova - «Astana Opera» Memlekettik opera jáne balet teatry operalyq trýppasynyń solısi, «Qurmet» ordeniniń Kavaleri. Qazaqstannyń operalyq óneri salasyndaǵy joǵary jetistikteri jáne Respýblıkadaǵy mádenı ómirdiń damýyna qosqan úlesi úshin marapattaldy;
- Aıgúl Azatova - Túrkistan oblystyq opera jáne balet teatrynyń solısi. Túrkistan oblysyndaǵy opera óneriniń damýyna qosqan úlesi úshin marapattaldy;
- Ábilmansur Serikov - Qýanyshbaev at. Memlekettik akademııalyq qazaq mýzykalyq-drama teatrynyń akteri. Teatrda qoıylǵan spektaklderde basty rólderdi somdaǵan úshin marapattaldy;
- Dına Baıtasova - «Artios» dırektory, «TSE Art Destination» zamanýı óner galereıasynyń negizin qalaýshy. Qazaqstannyń zamanýı sýret óneriniń damýyna qosqan úlesi úshin marapttaldy;
- Aqqalı Zákirov, Erjan Tanaev - «Tigrohaud crew» art-toby. Syılyq Qazaqstan boıynsha ǵımarattardyń qasbetti ózgertetin art-nysandar serııasyn daıyndaǵany úshin tabystaldy;
- Nıkıta Karev - Sh. Aımanov at. «Qazaqfılm» AQ kompozıtor-mýzykanty. Otandyq kınematografııanyń damýyna qosqan úlesi úshin marapattaldy;
- Dáýren Merkeev - «KTK» AQ bas dırektorynyń orynbasary. Áleýmettik jáne mádenı máselelerge arnalǵan beınerolıkter men derekti fılmderdi daıyndaǵany úshin.
