Astanada «Ǵylym álemin ashamyz» atty VII halyqaralyq konferentsııa ashyldy

QR Bilim jáne ǵylym mınıstrliginiń málimetinshe, konferentsııanyń maqsaty - ǵaryshtyq tehnologııalar, astrofızıka jáne modeldeý, Kosmos jáne Jer týraly ǵylym salasyndaǵy qoldanbaly zertteýlerge oqýshylardyń ǵylymı-zertteýshilik qabiletterin yntylandyrý.

Іs-shara aıasynda respýblıkanyń barlyq óńirinen kelgen oqýshylardyń qolymen jasalǵan jumystardyń kórmesi ashyldy. Kórmeni Bilim jáne ǵylym mınıstri Baqytjan Jumaǵulov pen Ulttyq ǵarysh agenttiginiń tóraǵasy Talǵat Musabaev aralap kórdi.

«Adamnyń ǵaryshqa, ǵalamshardyń zerttelmegen jerine umtylysy jalǵasa beredi. Meniń zamanymnyń urpaǵy ǵana ǵaryshker, konstrýktor bolýdy armandaǵan jáne ol umtylys sol zamanmen aıaqtalady dep oılaǵanmyn. Al myna kórmedegi keıbir ıdeıalardyń zamanaýılyǵy sonshalyq, olardy ǵylymı konstrýktorlyq turǵyda azdap jetildirip, qazirgi ǵarysh apparattary men kemelerinde qoldanýǵa bolady», - dedi jýrnalısterge bergen suhbatynda T.Musabaev.

Óz kezeginde BǴM basshysy, Talǵat Musabaevty adamzattyń ǵaryshty ıgere bastaǵanyna 50 jyl tolýymen quttyqtady. «Ǵaryshqa adamnyń ushqanyna 50 jyl tolýyn atap ótý qarsańynda barlyq ǵaryshkerlerdi, álem astronavtaryn, bizdiń qurmetti Talǵat Amangeldiuly men Toqtar Ońǵarbaıulyn (Áýbákirovti) osy ataýly datamen quttyqtaımyn», - dedi ol.

Konferentsııa jumysy ǵaryshtyq tehnıka jáne ınfraqurylym, ǵaryshtyq-aqparattyq tehnologııalar jáne úlgilendirý, ǵaryshtyq qyzmet jáne ekologııa, astrofızıka jáne ǵalamdyq evolıýtsııa, kún júıesi sektsııalary boıynsha ótip jatyr.

Іs-sharany uıymdastyrýshy - «Daryn» Respýblıkalyq ǵylymı-praktıkalyq ortalyǵy.