Astanada gúlder festıvali ótedi
ASTANA. QazAqparat - 3-5 maýsym aralyǵynda «Qazaqstan» sport saraıynyń janyndaǵy Stýdenttik parkte alǵash ret «Gúldene ber, meniń Qazaqstanym» atty gúlder festıvali ótedi.
Elordanyń resmı saıtynyń habarlaýynsha, merekelik shara barysynda gúlderdiń 32 myńnan astam túri kópshilik nazaryna usynylady.
- Gúlder festıvaliniń maqsaty - gúl ósirý dástúrin jańǵyrtý, mádenı keńistik múmkindikterin keńeıtý, elorda turǵyndary men qonaqtaryn qalanyń ekologııalyq damýyna tartý,- deıdi «Astana kógaldandyrý qurylys» AQ basqarma tóraǵasy Ádilhan Ábildınov.
Uıymdastyrýshylar kórermender úshin qyzyqty baǵdarlama ázirlemek. Shara barysynda «Gúlden sabyn jasaý» tujyrymdamasyna qatysýǵa bolady, onda eresekter men balalar óz qolymen gúldiń hosh ıisi bar sabyndar men balaýyzdar jasaýdy úırenedi. Bir jyldyq gúlder otyrǵyzý boıynsha sheberlik dáristeri ótedi, gúlder bazarynan otandyq óndirýshilerdiń ónimderin satyp alýǵa bolady, gúlderden basqa túrli aǵashtar men butalar da satylady. Sonymen qatar, park aýmaǵynda «gúlder» aspazdyǵynan dám tatý múmkindigi týady.
