Astanada grepplıngten respýblıka birinshiligi ótip jatyr
ASTANA. QazAqparat - Elordadaǵy «Jastar» saraıynda jasóspirimder arasynda grepplıngten jáne greplıng gıden Qazaqstan Respýblıkasynyń birinshiligi ótip jatyr, dep habarlaıdy QazAqparat tilshisi.
Eki kúnge sozylatyn sport básekesine elimizdiń barlyq aımaqtarynan 500-ge jýyq sportshy qatysýda. Balalar jáne jasóspirimder (1999-2006 jj) arasyndaǵy jarystyń nátıjesine sáıkes jeńimpazdar 2019 jyly Astanada ótetin Álem chempıonatyna joldama alady. Bıyl ulttyq qurama Qazaqstan grepplıng tarıhynda alǵash ret álemniń 24 eli arasynda top jaryp, jalpy esepte grepplıng jáne grepplıng gıden ІІ orynǵa kóterildi.
«El birinshiligi osymen 2 jyl qatarynan elordada ótýde. Sport jarysy 12 men 18 jas aralyǵyndaǵy jasóspirimderge arnalǵan jáne olar ishinara jas ereksheligi men salmaǵyna qaraı toptarǵa bólenidi. Búginde atalǵan sport túri Qazaqstanda jyl sanap keńinen etek alyp keledi. Biz aldymyzǵa Elordany álemdik deńgeıdegi grepplıng sportynyń astanasyna aınaldyrý maqsaty qoıylǵan. Taǵy bir aıta keterligi bul sporttyq shara demeýshiler men seriktesterdiń esebinen ótkizilýde. Budan bólek, jyl sońyna deıin eresekter arasynda ashyq respýblıka kýbogin ótkizemiz»,- dedi QR Grepplıng qaýymdastyǵynyń prezıdenti Qanat Alın.
Sonymen qatar, grepplıng qaýymdastyǵynyń basshysy ústimizdegi jyly atalǵan sport túri QR Mádenıet jáne sport mınıstrliginen akkredıtatsııadan ótkenin jáne kelesi jyly Astanada grepplıngten álem kýbogy ótetinin de tilge tıek etti.
Aıta keteıik, grepplıng - dzıýdo, sambo, djıý-djıtsý, erkin, grek-rım jáne basqa da kúrestiń barlyq stılin qamtıtyn jekpe-jektiń bir túri. Grepplıngtiń artyqshylyǵy - sportshylar eki sektsııa boıynsha kúresedi.
Eske salsaq, osy jyldyń jazynda elorda tórinde eresekter arasynda grepplıngten «Qazaq batyry» ataǵy úshin 100-den astam kúresshi baq synasqan bolatyn.
Odan bólek, ústimizdegi jyldyń 6-9 qyrkúıek kúnderi Astanada tuńǵysh ret grepplıngten əlem chempıonaty ótti. Oǵan 30-tan astam memleketten 1200 kúresshi qatysty. Elimizdiń sportshylary jalpy komandalyq esepte ІІ oryndy oljalady.
