Astanada grepplıngten «Qazaq batyry» chempıonaty ótip jatyr
ASTANA. QazAqparat- Elimizdiń ər óńirinen iriktep alynǵan kúresshiler grepplıngten "Qazaq batyry" ataǵy úshin Elorda tórinde baq synaýda, dep habarlaıdy QazAqparat tilshisi.
Grepplıngten chempıonat respýblıkalyq kólemde alǵash ret uıymdastyrylyp otyr. Aldymen aımaqtyq týrnır ótip, sonyń ishinde júzden júırik shyqqan 100-den asa sportshy Astanadaǵy respýblıkalyq jarysqa joldama aldy.
Sporttyq saıys Esil jaǵalaýynda ornalasqan ashyq aspan astyndaǵy Amfıteatrda eki kúnge jalǵasady. Grepplıng sportynyń erejesine səıkes, kúres eki bólimnen turady, birinshi kúni sportshylar kımonosyz kúresti, ekinshi kúni kımonomen kúresedi. Alǵash uıymdastyrylǵan aıtýly sporttyq shara 13 kategorııa boıynsha ótýde, onyń 8-i - erler, 5-eýi - əıelder arasynda.
"Respýblıkalyq saıystan chempıon atanǵan kúresshiler qyrkúıekte Astanada ótetin əlem chempıonatynda el namysyn qorǵaıdy. Birinshi kún qorytyndysy boıynsha ərtúrli salmaqtaǵy 8 kúresshi óz chempıondyq ataǵyn qorǵap, ulttyq qurama qataryna kirý quqyǵyna ıe boldy. Atalǵan sport túri elimizde endi tanyla bastaǵanymen, bizdiń kúresshilerimiz əlemdik arenada myqtylardyń qatarynda. Bizdiń endigi maqsatymyz - Elordamyzdy grepplıng kúresi joǵary damyǵan ortalyq retinde tanytý jəne osy sport túrinen əlemdik úzdik úshtiktiń qatarynan kóriný. Ol úshin bizde barlyq jaǵdaı jasalǵan" - , deıdi QR grepplıng qaýymdastyǵynyń prezıdenti Qanat Alın.
Aıta keteıik, ústimizdegi jyldyń 6-9 qyrkúıek kúnderi Astanada tuńǵysh ret grepplıngten əlem chempıonaty ótedi. Oǵan 40-tan astam memleketten 1200 kúresshi qatysady.
