Astanada grepplıngten halyqaralyq týrnır ótedi
ASTANA. QazAqparat - Elordadaǵy «Kórme» ortalyǵynda grepplıngten «ASTANA OPEN - 2019» halyqaralyq ashyq týrnıri ótedi, dep habarlaıdy QazAqparat tilshisi QR Grepplıng qaýymdastyǵynyń baspasóz qyzmetine silteme jasap.
«2019 jyldyń 26-27 qańtar kúnderi BAÁ, Brazılııa, Reseı, Qyrǵyzstan, Ózbekstan elderiniń grepplıng kúresiniń myqtylary Astanada jınalady. «Kórme» ortalyǵynda ótetin «ASTANA OPEN -2019» halyqaralyq ashyq týrnırine 700-den astam sportshy keledi dep kútilýde. Atalmysh týrnır grepplıngten dástúrli ótetin jyl saıynǵy sharalardyń alǵash shymyldyǵyn ashady», - dep habarlaıdy qaýymdastyq.
Ótken jylǵy básekede Qazaqstannan bólek, Úndistan, Reseı, Grýzııa, Qyrǵyzstan jáne Ózbekstan elderiniń ókilderi qatysyp, elimizdiń sportshylary jalpy komandalyq esepte І oryndy ıelendi.
Eske sala ketsek, bul sharadan bólek, ústimizdegi jyly Astanada grepplıngten álem chempıonaty ótedi.
Aıta keteıik, grepplıng - dzıýdo, sambo, djıý-djıtsý, erkin, grek-rım jáne basqa da kúrestiń barlyq stılin qamtıtyn jekpe-jektiń bir túri.
