Astanada Green bridge ınstıtýty ashylady
ASTANA. QazAqparat - Investıtsııalyq jobalar jáne jasyl texnologııalar boıynsha xalyqaralyq ortalyqtyń jetekshisi Rápil Joshybaev aldaǵy jospary týraly aıtyp berdi, dep xabarlaıdy QazAqparat tilshisi.
«Qazirgi kezde biz ozyq texnologııalardyń bazasyn jasaqtap jatyrmyz. Atalǵan bazada óndirýshiler, zertteý nátıjeleri men saraptamalar týraly tolyq aqparat bolady. Aldaǵy ýaqytta ortalyqtyń negizinde Green bridge ınstıtýtyn ashýdy josparlap otyrmyz. Ol jerde ǵylymı zertteýler ortalyǵy, energııa únemdeý ortalyǵy, jasyl texnopark pen bilim berý ortalyǵy bolady. Al xalyqaralyq uıymdardyń qarjysyn tartý maqsatynda jasyl qor qurylady», - dedi R.Joshybaev búgin balamaly energııa kózderine arnalǵan sammıtte.
Onyń aıtýynsha, ortalyqtyń negizgi maqsaty - otandyq energetıka salasynyń transformatsııasyna kómektesý, jasyl texnologııalardy engizý sharalaryna atsalysý.
«Biz osy saladaǵy kompanııalarmen strategııalyq baılanys ornatyp, balamaly energııaǵa arnalǵan jobalarǵa ınvestıtsııa tartatyn bolamyz. Biz Eýropa men Azııa arasyndaǵy kópirdiń bir konstrýktsııasy ispetti tájirıbe men texnologııalardyń ózara almasýyna da óz úlesimizdi qosa alamyz», - dep atap kórsetti R.Joshybaev.
Aıta keteıik, atalǵan sammıtte QR Energetıka vıtse-mınıstri Maxambet Dosmuxambetov balamaly energııa boıynsha alǵash ret uıymdastyrylǵan aýktsıondar týraly aıtyp berdi.
«Kúni keshe ǵana balamaly energııa kózderi boıynsha kóktemgi aýktsıondar aıaqtaldy. 10 aýktsıonnyń 8-i sátti ótti. Saýda-sattyqqa otandyq kompanııalar ǵana emes, sheteldik ınvestorlar da qatysty. Barlyǵy - 42 kompanııa. Olardyń ishinde Qazaqstan, Reseı, Frantsııa, Bolgarııa, Túrkııa men Qytaıdyń ókilderi bar. Biz alǵash ret xalyqaralyq saýda-sattyqty elektrondy formatta ótkizdik. Qatysýshylar 960 MVt energııany óndirýge daıyn ekenin jetkizdi. Atalǵan kórsetkish alǵashqy jospardan tórt esege artyq bolyp tur», - dedi M.Dosmuxambetov.
Al «Atameken» UKP tóraǵasynyń orynbasary Eldos Razanov Ekologııalyq kodeks jaıynda aıtty.
