Astanada grantqa túsiremin dep 111 azamattan 70 mln teńge alǵan adam sottaldy
ASTANA. KAZINFORM – Astana qalasynyń prokýratýrasy bilim berý granttaryn alýǵa, sondaı-aq magıstratýra men doktorantýraǵa túsýge járdem kórsetý týraly zańsyz ýádelermen baılanysty alaıaqtyq faktisi boıynsha qylmystyq is boıynsha memlekettik aıyptaýdy qoldady.
Qalalyq prokýratýra baspasóz qyzmetiniń habarlaýynsha, sottalýshy azamattardy bilim berý salasynda baılanystary bar ekenine jáne oqýǵa túsý men grant alý máselelerin kepildi túrde sheshýge múmkindigi bar ekenine sendirip, olardy adastyrǵan. Onyń ýádelerine sengen jábirlenýshiler oǵan qomaqty aqsha qarajatyn bergen.
Shyn máninde qandaı da bir qyzmet kórsetilmegen, al alynǵan aqsha qarajatyn qaskóı ıemdenip, óz qalaýynsha jumsaǵan.
Qylmystyq áreketterdiń saldarynan 111 azamat zardap shegip, keltirilgen jalpy zalal shamamen 70 mıllıon teńgeni qurady. Bul rette jábirlenýshilerdiń basym bóligine keltirilgen zalal ótelmegen.
Kinásin moıyndaǵanyna qaramastan, sot sottalýshyǵa 4 jyl merzimge bas bostandyǵynan aıyrý jazasyn taǵaıyndady.
Sot úkimi 2026 jylǵy 12 mamyrda zańdy kúshine endi.
-Prokýratýra eske salady: oqý oryndaryna túsý jáne bilim berý granttaryn alý tek zańdy negizderde júzege asyrylady. Mundaı máselelerdi aqshalaı syıaqy úshin sheship berýge ýáde etetin tulǵalarǵa senbeńizder. Osyndaı faktilerge tap bolǵan jaǵdaıda dereý quqyq qorǵaý organdaryna habarlasyńyzdar,-delingen habarlamada.
Osyǵan deıin Astanada JOO qyzmetkeri grantqa túsirip beremin degen jeleýmen 3 mln teńge ıemdengeni týraly jazdyq.
