Astanada ǵımarat opyrylǵanda zardap shekken feldsherdiń jaǵdaıy óte aýyr

ACTANA. KAZINFORM – Astanada turǵyn úı kesheniniń qasbeti qulaýy saldarynan zardap shekkenderdiń qazirgi jaǵdaıy anyqtaldy. Bul týraly Astana ákimdiginiń baspasóz qyzmeti habarlady.

Turǵyn úı kesheniniń qasbetindegi kirpish qaptamasy men kondıtsıoner qondyrǵysynyń bóligi qulap, saldarynan 5 adam zardap shekti. Zardap shekkenderdiń bári 8 qarasha kúni №1 kópsalaly aýrýhanaǵa jetkizildi.

– 9 qarashadaǵy jaǵdaı boıynsha eki naýqas jansaqtaý bóliminde jatyr. Úsh naýqas beıindi bólimshelerde em qabyldap jatyr. Zardap shekkenderdiń ekeýi eńbek mindetterin oryndaý barysynda jaraqat alǵan feldsherler ekenin habarlaımyz. Jansaqtaý bóliminde jatqan feldsherdiń jaǵdaıy óte aýyr. Ekinshi feldsherdiń jaǵdaıy – ortasha, ol neırohırýrgııa bólimshesinde em alyp jatyr, - delingen habarlamada.

Barlyq patsıent dárigerlerdiń baqylaýynda, olarǵa qajetti medıtsınalyq kómek kórsetilip jatyr.

– Áleýmettik jelide taraǵan «feldsherlerdiń alǵan jaraqaty óndiristik jaraqat retinde tanylmady» degen aqparat shyndyqqa janaspaıdy. Atalǵan oqıǵa óndiristik jaraqat retinde tirkelgen. Sonymen qatar jaraqat alý faktisi boıynsha qalalyq Polıtsııa departamenti sotqa deıin tergeý júrgizip jatyr. Sondaı-aq Qazaqstan Respýblıkasynyń Eńbek kodeksiniń 188-babyna sáıkes memlekettik eńbek ınspektory tergeý jumysyn oryndaýda, - dedi ákimdikten.

Buǵan deıin Astananyń Almaty aýdanynda, Táýelsizdik dańǵyly, 24B mekenjaıynda toǵyz qabatty turǵyn úıdiń qasbetinen kirpishten jasalǵan syrtqy qaptama men kondıtsıoner qondyrǵysy qulap, bes adam zardap shekkenin jazǵan bolatynbyz.