Astanada Geıdar Álıevti eske alýǵa arnalǵan shara ótti

ASTANA. QazAqparat - Astanada Ázerbaıjannyń jalpyulttyq kóshbasshysy Geıdar Álıevti eske aldy. Ázerbaıjannyń Qazaqstandaǵy Elshiliginde uıymdastyrylǵan sharaǵa dıplomatııalyq mıssııa basshylary, Qazaqstannyń qoǵamdastyq ókilderi qatysty, dep habarlaıdy QazAqparat.

Shara Geıdar Álıev týraly fılmmen bastaldy. Odan keıin Ázerbaıjan Respýblıkasynyń Qazaqstandaǵy Tótenshe jáne Ókiletti Elshisi Rashad Mammadov sóz sóılep, ázerbaıjan halqynyń jalpyulttyq kóshbasshysynyń ómiri men qyzmeti týraly egjeı-tegjeıli baıandap berdi.

Al Reseı Federatsııasynyń Qazaqstandaǵy Tótenshe jáne Ókiletti Elshisi Alekseı Borodavkın Geıdar Álıevpen jeke tanys bolǵandyǵy týraly áńgimeledi.

Budan keıin sóz kezegi Halyqaralyq túrki akademııasynyń prezıdenti Darhan Qydyrálige berildi. Ol Geıdar Álıevtiń táýelsiz Ázerbaıjannyń qalyptasý jolyndaǵy róli, aǵymdaǵy jyly atap ótiletin Ázerbaıjan Demokratııalyq Respýblıkasynyń (ÁDR) 100 jyldyq mereıtoıy týraly aıtyp,  jalpyulttyq kóshbasshynyń óz eliniń tarıhyna erekshe kóńil bólgenin jetkizdi.

Budan keıin sharaǵa qatysýshylar Ázerbaıjannyń Qazaqstandaǵy Elshiliginde jasaqtalǵan Geıdar Álıev murajaıyna baryp, arnaıy uıymdastyrylǵan fotokórmeni tamashalady.