Astanada Gerold Belgerdiń eki tomdyq jınaǵynyń tusaýkeseri ótti

ASTANA. KAZINFORM - Qazaqstan Respýblıkasynyń Ulttyq akademııalyq kitaphanasynda qazaq ádebıetiniń kórnekti aýdarmashysy, jazýshy jáne pýblıtsıst Gerold Belgerdiń 90 jyldyǵyna oraı eki tomdyq «Tańdamalylar» kitabynyń tusaýkeseri ótti.

Oǵan mádenıet jáne qoǵam qaıratkerleri, aqyn-jazýshylar, ádebıettanýshylar men aýdarmashylar, sondaı-aq Reseı dıplomatııalyq korpýsynyń ókilderi qatysty.

Іs-sharada QR MAM Arhıv, qujattama jáne kitap isi komıtetiniń tóraǵasy Rýstam Alı mınıstr Aıda Balaevanyń quttyqtaý hatyn oqyp berdi.

Mınıstr quttyqtaýynda Gerold Belgerdiń qazaq ádebıeti men mádenıetin dáripteýdegi adal qyzmeti men kóptildi murasy keleshek urpaq úshin mańyzdy qundylyq ekeni aıtylǵan.

«Bul jınaq QR Mádenıet jáne aqparat mınıstrligi úılestiretin «Qoǵamdyq mańyzy bar ádebıetterdi basyp shyǵarý jáne taratý» memlekettik baǵdarlamasy aıasynda jaryq kórip, elimizdiń kitaphanalaryna taratylady. Budan bólek bıyl biregeı tulǵaǵa arnalǵan júzden astam rýhanı is-shara elimizdiń túkpir-túkpirinde keńinen atalyp ótýde. Jyldyń keıingi shıreginiń ózinde Gerold Belgerdiń 90 jyldyq mereıtoıy qarsańynda 32 is-shara josparlanyp, qalyń oqyrmanǵa usynylýda. Mınıstrlik tarapynan jazýshynyń shyǵarmashylyǵy men ómir jolyn nasıhattaý jumystary da qarqyndy júrgizilýde. Telearnalar arqyly taraǵan «Biregeı» baǵdarlamasy, «Biz birgemiz» rolıgi, «Neızdannye proızvedenııa Gerolda Belgera» sıýjetterin erekshe atap ótkim keledi», – delingen quttyqtaý hatta.

Sondaı-aq, jıynda jazýshynyń qyzy Irına Kovaleva-Belgerdiń is-shara uıymdastyrýshylaryna alǵys bildirgen haty oqyldy.

«Qazaqstannyń ár óńirinde Gerold Belgerdiń 90 jyldyq mereıtoıy aıasynda kóptegen is-sharalar ótkizilip jatyr. Sondaı mańyzdy sharanyń biri – eki tomdyq jınaqtyń jaryq kórýi. Birinshi tomda eń úzdik áńgimeleri men shyǵarmalary jınaqtalǵan. Ekinshi tom ómirindegi asa qymbat jandarǵa, birge ómir súrgen, ózi talantyn joǵary baǵalaǵan adamdarǵa arnalǵan. Onyń shyǵarmashylyǵy men ómirine qyzyǵýshylyq tanytyp, nasıhattap jatqandaryńyz úshin sheksiz alǵys bildiremiz», – dedi I. Kovaleva-Belger.

Gerold Belgerdiń jańa eki tomdyq «Tańdamalylar» jınaǵyna 140-tan asa shyǵarmalary men aýdarmalary enip, árqaısysy 3000 danamen jaryqqa shyqty.